Күңел йылытыр ҡуҙ өҫтәп

Дәүләкән ҡалаһының балалар китапханаһында ошо районда тыуып үҫеп, бар ғүмерен тыуған төйәгенә хеҙмәт         итеүгә арнаған ижади шәхес Гөлшат Ҡотлоәхмәт ҡыҙы Саматованың юбилей кисәһе үтте.

 Гөлшат Ҡотлоәхмәт ҡыҙы ра­йондың Мәкәш ауылында тыуып үҫкән. Оҙаҡ йылдар ауыл советында секретарь, эштәр идара­сыһы вазифаларын башҡара, ауылдағы бихисап башланғыс­тарҙы ойоштороусы булараҡ таныла. Ул ойошторған кисәләрҙе, туй тантаналарын Мәкәш халҡы бөгөн дә һоҡланып, һағынып иҫкә ала. Заманында уның никах теркәү сараһы сценарийҙары тотош республикаға өлгө итеп таратыла.

Гөлшат апайҙы талантлы шағи­рә, “Аҡбуҙат” журналының баш мөхәррире Лариса Абдуллинаның әсәһе булараҡ та беләбеҙ. “Шәхес булараҡ үҫешемдә, әҙәбиәткә, шиғ­риәт донъяһына һөйөү тәрбиәләүҙә иң ҙур роль уйнаған кеше – әсәйем. Бөгөн ниндәйҙер уңыштарға өлгәш­кәнмен икән, уларҙың яртыһы, бәлки, унан да күберәге – әсәйем­дең өлөшө ул”, – тине Лариса, ҡәҙерле кешеһенә рәхмәт хисен белдереп.

Гөлшат Ҡотлоәхмәт ҡыҙы үҙе лә хисле шиғырҙар, матур йөкмәт­келе хикәйәләр ижад итә, бихисап баҫмалар менән хеҙмәттәшлек итеп, тыуған төйәгенең һоҡланғыс кешеләре тураһында мәҡәләләр яҙа. Гөлшат Саматова – урындағы “Дим” әҙәби берекмәһенең әүҙем ағзаһы ла. Ошо берекмә менән берлектә һәм айырым да китаптары донъя күргән.

Ихлас аралашыуға ҡоролған сарала яҙыусылар – “Һәнәк” жур­налының баш мөхәррире Миләүшә Ҡаһарманова, “Шоңҡар” журналы­ның баш мөхәррире Айгиз Баймө­хәмәтов, шағирәләр – “Аҡбуҙат” журналының баш мөхәррире Лариса Абдуллина, “Ағиҙел” журна­лының бүлек мөдире Гөлнара Хәлфетдинова, журналистар Гөл­наз Шәйхетдинова, “Дим” әҙәби берекмәһенең әүҙем ағзалары, Гөлшат апайҙың ауылдаштары, Мәкәш мәктәбе уҡытыусылары һәм уҡыусылары, Дәүләкән ҡалаһын­дағы 3-сө башҡорт гимназияһында белем алыусылар ҡатнашты.

Башҡортостандың халыҡ артисы Рәмзиә Хисамованың сараға килеп, абруйлы шәхестең шиғыр­ҙарын уҡыуы кисәгә йәм һәм биҙәк кенә булды. Бер тында үткән йырлы-моңло кисәне Дәүләкән район хакимиәтенең мәҙәниәт бүлеге (етәксеһе – Рәфис Вәкил улы Әх­мәтрәхимов), “Дим” әҙәби берек­мәһе, Әхиәр Хәкимов исемендәге музей коллективы, Дәүләкән ҡала­һының балалар китапханаһы хеҙ­мәткәрҙәре юғары кимәлдә ойош­тороуға өлгәште. Дәүләкән район мәҙәниәт йорто методисы Эльмира Аҙнашева осрашыуҙы йылы мөхит­тә, ихлас аралашыуға ҡороп алып барҙы.

Сығыш яһаған һәр кем Гөлшат Ҡотлоәхмәт ҡыҙының иҫ киткес матур сифаттарға эйә булыуын билдәләне. Яҡындары – уның изге күңелле әсә, туған йәнле кеше, уңған хужабикә булыуы, ауылдаштары ярҙамсыллығы, киң күңел­лелеге хаҡында һөйләне. Ижадташ дуҫтары хис-моңдан туҡылған шиғриәтенә, йөрәктәргә үтеп инерлек итеп шиғыр һөйләү оҫталығына һоҡланыу белдерҙе.

Тормош һынауҙары алдында бөгөлөп төшмәгән, һәр саҡ күңел бөтөнлөгөнә, үҫешкә ынтылып йәшәгән, башҡаларҙы ла шуға әйҙәгән көслө лә, хисле лә заман­даш­тарыбыҙҙың береһе ул – Гөлшат апай Саматова. “Мине, ябай ауыл ҡатынын, шул тиклем ҙурлап, күңелемде йылытыр ҡуҙ өҫтәнегеҙ, көс-дәрт бирҙегеҙ!” – тине юбиляр, кисәне йомғаҡлап.

- Гөлдәр ЯҠШЫҒОЛОВА