Халыҡ менән бергә эшләйҙәр

Бөгөн Башҡортостан Башлығы Радий Хәбиров ОТР телеканалына (Рәсәй Йәмәғәт телевидениеһы) ҙур интервью бирҙе. Ул республикабыҙ үҫешенә бәйле ине.

Радий Хәбиров үҙенең идара итеү командаһы стратегияһы тураһында һөйләне.

– Эшебеҙҙе халыҡ ҡуйған бурыстарҙан сығып төҙөйбөҙ. Кешеләрҙең эшебеҙгә баһа биреүе бик ҡыуаныслы. Аралашыу, мөрәжәғәттәр, шәхси контакттар барышында улар электән килгән проблемаларға иғтибар итеүҙе һорай. Был проблемаларҙы хәл итеү беҙҙең идара итеү командаһының төп бурысы булып торҙо. Шул уҡ ваҡытта беҙ бер ҡасан да үҫеш стратегияһы хаҡында онотманыҡ. Маҡсатыбыҙ, буласаҡ ҡаҙаныштар, еңеүҙәр өсөн нигеҙ булдырҙыҡ, – тине Радий Хәбиров.

Республика халҡының төрлө мәсьәләләр буйынса фекерҙәрен ишетеү өсөн Башҡортостан етәкселеге күп каналлы мәғлүмәт алыу системаһын файҙалана.

“Беҙҙә халыҡтан мәғлүмәт ҡабул итеүҙең күп каналлы юлдары бар: уларҙың фекерҙәре, теләктәре, тәҡдимдәре, фекерҙәре. Граждандар мөрәжәғәттәре менән эшләү идаралығынан тыш, социаль селтәрҙәр анализы аша донъя картинаһын күрәбеҙ, беҙҙә “Инцидент менеджмент” программаһы эшләй, Социаль коммуникациялар идаралығы бар, социаль селтәрҙәрҙә барған бөтә нәмәне теркәйбеҙ, кешеләрҙең мөрәжәғәттәрен ҡабул итәбеҙ. Өҫтәүенә социаль селтәрҙә бик күп яҙылыусыларым бар. Бөтә мөрәжәғәттәрҙе коллегаларым күҙәтә һәм эшкәртә”, – тип билдәләне Радий Хәбиров.

Интервью барышында Радий Фәрит улы республикала ауыл хужалығы үҫеше тураһында ла һөйләне. Һуңғы йылдарҙа төбәк үҙенең аҙыҡ-түлек именлеген тәьмин итте, ауыл хужалығы продукцияһын, шул иҫәптән игенде экспортҡа оҙата, быға тармаҡты яңыртыу һөҙөмтәһендә өлгәшеп булды.

– Ауыл хужалығын, атап әйткәндә, үҫемлекселекте яңыртмаһаҡ, бер нәмәне лә хәл итә алмаясағыбыҙҙы аңланыҡ. Өс йыл эсендә 42 миллиард һумға техника һатып алынған. Хәҙер беҙҙең бурыс – өлгөрөп еткән уңышты ике аҙна эсендә мөмкин тиклем тиҙерәк йыйыу йәки ҡар ирегән, тупраҡ еүеш осорҙа яҙғы баҫыу эштәрен башҡарыу. Бик күп тракторҙар, комбайндарһыҙ быны эшләп булмай, шуға күрә яңыртыу юлынан киттк, – тине Радий Хәбиров.

Төбәк Башлығы һүҙҙәренсә, бындай ҡараш һөҙөмтәләр бирә: һуңғы дүрт йылда республика ике тапҡыр яҡшы иген уңышы – 4 миллион тоннанан ашыу алды.

“Быйыл беҙ биш миллион тонна иген йыйып алдыҡ, 1986 йылдан алып рекордлы уңыш, иген киптергестәр менән бәйле проблемалар булды, ләкин беҙ уларҙы хәл иттек, һәйбәт хаҡтар көтәбеҙ һәм һатасаҡбыҙ, – тине Радий Хәбиров.

Фото: "Башинформ".