Йәнырыҫтың ырыҫын арттырып...

Тормошобоҙҙа матдилыҡ өҫтөнлөк ала барһа ла, йәмғиәтебеҙ, йәшәйешебеҙ нигеҙе ул – мәҙәниәт. “Башҡортостан” гәзитенең “Бәйләнештә” төркөмөндә барған конкурста ҡатнашҡан Гөлнур Кирәева – Ишембай районының Йәнырыҫ мәҙәниәт йорто етәксеһе. Һөнәре буйынса режиссер-ҡуйыусы булыуы илаһи театр, сәнғәт донъяһында ихласлап эшләү мөмкинлеген бирә уға. Ғөмүмән, Гөлнур Мансур ҡыҙы – барлыҡ булмышы менән мәҙәниәт кешеһе. Өҫтәүенә, уның башланғыстарын ире Рәмил Рәшит улы ла хуплай, ныҡлы терәк-таянысы ул. Икәүһенең ҡулға-ҡул тотоноп йәшәүҙәренә лә быйыл 25 йыл тулған. Икеһе лә - ошо Йәнырыҫ ауылынан, тыуған ауылдарының ырыҫын арттырып матур йәшәргә ынтылалар.

Гөлнур менән Рәмил Кирәевтәр өс бала тәрбиәләп үҫтергән. Улар ҙа сәхнәне үҙ итә, ата-әсәһе кеүек тырыш, уңған, маҡсатлы, сәмсел.

Тормош уртаһында ҡайнап, рухи ҡиммәттәргә өҫтөнлөк биреп, тирә-яҡҡа дәрт-моң өҫтәп, мәҙәниәтебеҙгә хеҙмәт иткән Гөлнур Мансур ҡыҙы Кирәева өсөн дә тауыш бирәйек, дуҫтар! Уның өсөн дә лайктар ҡуяйыҡ һәм комментарийҙар яҙайыҡ.

Фотолар Гөлнур Кирәеваның шәхси архивынан.