Ярҙам йыйыуҙа мутлыҡҡа юл ҡуйылмаясаҡ

Өфө эргәһендә Зубов ауылында махсус хәрби операцияла ҡатнашыусыларға ярҙам күрһәтеүҙең берҙәм логистик үҙәге асылды. Алдан хәбәр ителеүенсә, бындай йөкләмәне Башҡортостан Башлығы Радий Хәбиров биргәйне.

Әлегә тиклем предприятиелар, йәмәғәтселәр ярҙамды йыя һәм уны үҙаллы алып бара ине, ә был проблемаларға килтерә. Кемдер үтә алмаған, икенселәре дөрөҫ булмаған урынға барып сыҡҡан йәки махсус хәрби операция линияһына кәрәкмәгән әйберҙәр килтергән. Тағы шундай осраҡтар ҙа бар: ҡайһы бер мутлашыусылар “ярҙам", шул иҫәптән аҡса йыйған һәм юғалған. Хәҙер бындай проблемаларҙы берҙәм ҡабул итеү пункты юҡҡа сығара. Унда машиналарҙы үҙәкләштереп комплектлаясаҡтар һәм кәрәкле әйберҙәрҙе ҡайҙа кәрәк - шунда алып барасаҡтар.

Үҙәктең аныҡ адресы: Өфө районы, Зубов ауылы, Аграр урамы, 8, 1-се төҙөлөш (Өршәк ст.), “Башсельхозтехника” ойошмаһының келәте. Эш ваҡыты: дүшәмбе-шәмбе иртәнге сәғәт 8-ҙән киске 5-кә тиклем, көндөҙгө 12-нән 1-гә саҡлы тәнәфес. Һәр ҡалала һәм районда ярҙам ҡабул итеү пункттары бар. Өфөлә ул Ғафури урамы, 6 адресы буйынса урынлашҡан. Эш ваҡыты: иртәнге сәғәт 8-се яртынан киске 6-сы яртыға тиклем (төшкө аш 1-ҙән 2-гә ҡәҙәр), ял көндәре – шәмбе, йәкшәмбе, байрам көндәре. Телефон: 89378460320.

Нимә ебәрергә мөмкин? Эске кейемдәр, шәхси гигиена әйберҙәре, олтораҡтар, батарейкалар, дымлы салфеткалар, һабын, термокейем, быҡтырылған ит, балыҡ консервалары, кәнфиттәр, ҡуйыртылған һөт, тәмәке, шәкәр, шоколад, сәй, кофе. Тиҙ боҙолоусан аҙыҡ-түлек, быяла һауыт-һаба һәм алкоголь ебәрергә ярамай.

Аҡса менән нисек ярҙам итергә? Аҡса “Салауат” хәйриә фонды аша йыйыла. Көсөнән килгән сумманы реквизиттар буйынса йәки һүрәттәге куар-код ярҙамында күсерергә мөмкин. Бының өсөн мобиль банкты асығыҙ, “Түләүҙәр” бүлеген һайлағыҙ, ә артабан “QR-код буйынса түләү” бүлеген асып, камераны кодҡа ҡуйығыҙ.

Белешмәләр өсөн телефон: 7 (347) 280 89 92.

Фото: "Башинформ".