60 парҙан ашыу ойоҡ бәйләнде

Махсус хәрби операцияла ҡатнашҡан һалдаттарыбыҙға йылы ойоҡ бәйләү буйынса Бөтә Рәсәй "Беҙҙең йөрәк йылыһы" акцияһы үтте. Мәләүездә был ҙур эште беренселәрҙән булып 3-сө гимназия уҡыусыһы Розалия Зөбәйерова башланы.

– Төрлө акциялар тураһында күп ишеттем, үҙем дә махсус хәрби операциялағы ағайҙарға ярҙам күрһәтергә теләнем. Социаль сел­тәрҙәрҙә кемдер башлап ебәрһә,  кешенең күпләп ҡушыла икәнен аңланым. Оҙаҡ уйлап тормай,  уйым­ды уҡытыусыма һәм класташтарыма һөйләнем. Үҙемдең йыйылған аҡсам бар ине, иләнгән йөн менән энәләр һатып алдым. Тик бер проблема тыуҙы – йәштәрҙең береһе лә ойоҡ бәйләй белмәй. Ярҙамға ағинәйҙәр һәм “Һуғыш балалары” ойошмаһы вәкилдәре килде. Дуҫ­тарым һәм яҡындарым араһында был акциянан баш тартҡан кеше булманы, – ти ҡыҙ.

Акция бер ай дауам итте, ултырыштар китапханала һәм мәктәптә үтте. Инәйҙәр балалар менән тәж­рибә уртаҡлашты. Балалар йәбеш­термәләр яһатып, һәр һалдатҡа хаттар яҙған. Тәмле бүләктәр тура­һында ла онотманылар. Акцияла ҡатнашыусыларҙың барыһы ла ошо әйберҙәргә үҙҙәренең күңел йылы­һын һәм наҙын һалды.

- Гөлназ САЛАУАТОВА