Бөтә яңылыҡтар
Йәмғиәт
23 Декабрь 2022, 19:17

Оҫта ҡулында тимер ҙә сәскә ата...

Автор фотоһы.
Фото:Автор фотоһы.

Раевка шәкәр заводында эшләгән ирҙәр йорттарында тимер бөгә, ҡойма тота, ихаталарын сынъяһау итә. Һәр оҫтаның үҙ стиле, үҙ һәләте, тигәндәй.

Руслан Мәжитов, йәш кенә ғаилә башлы­ғы булыуына ҡарамаҫтан, ике йыл эсендә тимерҙән сүкеп, селтәрле әйберҙәр яһау оҫ­та­һы булып танылған. Ауыр эштең үҙен­сәлектәрен дә өйрәнгән. Кемдән тип һо­ра­һағыҙ, бергә шәкәр етештергән хеҙмәт­тә­шенән. Егет хеҙмәт ҡорамалдарын да үҙе эшләй. “Тәүҙә әйберҙең дизайнын уйлайым, тейешле кәрәк-яраҡты әҙерләйем һәм аҙаҡ конструкцияны йыям. Иң ҡатмар­лыһы – төрлө һындарҙы эшләү”, – ти йәш оҫта.

“Мәжитовтарҙың ихатаһын тимерҙән сүкеп яһалған төрлө әйберҙәр биҙәй”, – тип һоҡланып яҙа “Әлшәй хәбәрҙәре” гәзите. Руслан ҡапҡа, мангал эшләп ҡуйған, оҫта ҡулында дельфин, болан, ҡош һын­дары йәнләнгән, хатта тимер ҙә сәскә атҡан!

Ул бөтә матурлыҡты ҡатыны Элинаға бүләк иткән. Раевка дауаханаһында шәф­ҡәт туташы булып эшләгән хужабикәнең бөхтәлек, гүзәллек яратыуын Руслан яҡшы белә. Уларҙың шуҡ, шаян малай­ҙары Камил менән Ранэль дә атайҙа­рынан оҫта­лыҡҡа өйрәнергә, барыһын да белергә тырыша. Яратҡан шөғөлө менән булышырға ғына һәр саҡ  ваҡыт тәтемәй, Раевка шәкәр заводының төп цехында оператор булып эшләү ир-егеткә ҙур яуаплылыҡ йөкмәтә.

- Айгөл МӨХӘМӘТДИНОВА
Әлшәй районы

Читайте нас: