Шушнур яҡтарында ни хәлдәр?

Һәр төбәктә йәшәүселәрҙең үҙ мәшәҡәте, шатлыҡ-көйөнөстәре. Бер проблеманы хәл итеүгә яңыһы ҡалҡа, ошо рәүешле тормош үҙ яйы менән аға. Халыҡтың тормош-көнкүреш шарттарын яҡшыртыуҙы хәстәрләү мәсьәләһе – һәр төбәктә уртаҡ күренеш.

Краснокама  тарафтарында булғанда, Шушнур ауыл хакимиәте башлығы Эльвира Ғиләжетдинова менән күрешеп, ошо биләмәлә йәшәүселәрҙең көнкүреше, борсоған мәсьәләләре менән ҡыҙыҡһындыҡ.

– Эльвира Наил ҡыҙы, билә­мәлә төҙөкләндереү буйынса кү­релгән саралар тураһында нимә әйтерһегеҙ, 2022 йыл нимәһе менән үҙенсәлекле булды?

– Шушнур ауыл биләмәһенә ете ауыл һәм коммерцияға ҡарамаған бер баҡсасылыҡ ширҡәте инә. Халыҡ һаны мең ярымға яҡын. Тө­ҙөкләндереү йәһәтенән “Урындағы баш­ланғыстарға булышлыҡ итеү” програм­ма­һының файҙаһын күрәбеҙ. Унда 2016 йылдан ҡатна­шабыҙ һәм күп нәмәгә өлгәш­тек. 2016-2017 йылдарҙа Яңы Аҡтанышбаш һәм Шушнур ауылдарында зыярат ҡойма­ларын яңырт­тыҡ, 2018-2019 йылдарҙа Яңы Аҡтанышбаш мәктә­бенең тәҙрә-ишектәре, электр сел­тәрҙәре алмаштырылды, йылы бәҙ­рәф эскә көйләнде. 2020 йылда ла ошо уҡ ауылда клубтың ишек-тәҙрәләрен алмаштырҙыҡ. 2021 йылда был программала ҡатна­шып, конкурсты уңышлы үттек. Был йылда Шушнур ауыл мәктә­бенең тәҙрәләре өр-яңынан ҡуйыл­ды. Алдағы йылда ла халыҡ “Урын­дағы башланғыстарға булышлыҡ итеү” программаһында ҡатнашыр­ға теләк белдерҙе. Был юлы Түбән Таҡыя ауылында зыярат ҡоймаһын  яңыртмаҡсы­быҙ. Әлбиттә, программала ҡатнашыу өсөн халыҡтың теләге һәм ярҙамы кәрәк. Бары тик бергә һәм берҙәм булыуыбыҙ арҡаһында был эштәрҙе башҡарып сығырға мөмкин.

Башҡа программаларҙың да ярҙамын тоябыҙ. Мәҫәлән, былтыр “Берҙәм Рәсәй” партияһының  “Реаль эштәр” программаһы буйынса   Түбәнге Таҡыя ауылында йәйәүле­ләр өсөн йылға аша күпер ремонтланды. Уға тиклемге йылдарҙа  Яңы Мошто ауылында спорт май­ҙансығы һәм Яңы Аҡтанышбашта балалар майҙансығы булдырылды. 

– Ауыл биләмәһендә йәшәү­се­ләрҙе борсоған, алда торған проблемалар ҙа барҙыр?

– Хәл итәһе мәсьәләләр етерлек. Юлдар иғтибар талап итә, уларҙы яңыртырға кәрәк.  Әлбиттә, йыл һайын ремонт яһап, мөмкин булғанса төҙөкләндереп торабыҙ. Сүп-сарҙы сығарыу буйынса ла хәл итәһе мәсьәлә бар, сүпте айына бер алып китеүҙәре борсой. Ошо эште яйға һалырға кәрәк.

Ғөмүмән, киләһе йылда ла халы­ҡтың мән­фәғәтен хәстәрләп эшләр­гә, йәшәргә тигән маҡсатыбыҙ юғалмай. Был йүнәлеш­тәге эш бер ҡасан да туҡталырға тейеш түгел.

Резеда ШӘҢГӘРӘЕВА