Яңы уйын майҙансығы кәрәк

“Урындағы башланғыстарға  булышлыҡ итеү”  программаһы күп йылдар буйы йыйылған мәсьәләләрҙе хәл итеүҙең бер ысулы булып тора.

Баймаҡ ҡалаһының иң матур  ‘’Миләш’’  балалар баҡсаһы асы­лыуға тиҫтә йыл ғына булһа ла, ярҙамға мохтаж. Балаларыбыҙ  сәлә­мәт булып, тышта күберәк уйнап, көс алып үҫһен өсөн, беҙгә яңы уйын майҙансығы кәрәк.  Яңы программа ғәмәлгә ингәс тә, беҙҙең коллектив, ата- әсәләр, балалар баҡсаһына яҡын йәшәгән урам халҡы ла ошо башланғысты дәррәү күтәреп алды һәм үҙ көсөн һынап ҡарарға булды.

Беҙҙең маҡсат – СанПин ҡағиҙә­лә­ренә тап килерлек уйын майҙан­сығын ҡоролмалар менән тәьмин  итеү. Программаға ҡушылыу өсөн ата-әсәләр, педагогтар һәм урам халҡы әүҙемселәренән инициативалы төркөм төҙөлдө. Улар программа буйынса аңлатыу эштәре алып бара. Төрлө осрашыуҙар,  балалар ҡуйған концерт, йәрмин­кәләр,  листовкалар таратыу, үҙебеҙҙең дуҫтар – Баймаҡ ҡала­һының  1-се мәктәбе коллективы ме­нән үткәрелгән саралар беҙҙең башланғысҡа көс-дәрт өҫтәй.

Ил төкөрһә, күл булыр, тигәндәй, маҡсаттарыбыҙға өлгәшербеҙ, тип өмөт итәбеҙ.

- Мәүлиҙә ҠАШҠАРОВА,  
     Гөлфиә МӨХӘМӘТЙӘРОВА