“Бәхетле” гөлдәр үҫтерегеҙ

Йәмле йәй алыҫта ҡалһа ла, кәйефегеҙ төшмәһен, матур мәлдәрҙе иҫкә алып, бүлмәгеҙҙә гөлдәр үҫтерегеҙ. Улар матур булыу өҫтөнә файҙалы ла, хатта ғаиләгеҙгә уңыш килтереүе лә ихтимал. Күп быуындарҙың тәжрибәһе йорттарға бәхет, гармония, татыулыҡ һәм тыныс мөхит килтереүсе үҫемлектәрҙе асыҡларға ярҙам иткән.

Шул һоҡланғыс гөлдәрҙең береһе – яран. Был гөлдөң сәс­кәләре аҡ, ал, сағыу ҡыҙыл төҫтә була. Халыҡ фараздары буйынса, ул үҙенә һөйөү тойғоларын тар­тырға, мөнәсәбәттәрҙе нығытырға һәләтле. Йоҡо бүлмәһенә сағыу ҡыҙыл, ҡыҙҙар бүлмәһенә – алһыу, аҡ йәки сирен төҫлөләрен ҡуйыу урынлы. Фэн-шуй раҫла­уынса, бәхетле парҙарҙың мөхәббәтен һаҡлау өсөн гөл һауыттары парлы булырға тейеш.

Красула үҫемлеген йыш ҡына “аҡса” ағасы тип йөрөтәләр. Һис тә юҡҡа түгел. Фараздарға ҡа­рағанда, был ябай ғына, йоморо ҡа­лын япраҡлы үҫемлек финанс то­тороҡлоғон һаҡлай. Хатта ҡай­һы берәүҙәр үҫемлек менән бергә бер нисә тинлекте лә тупраҡҡа күмеп ҡуя. Дөрөҫтөрмө-юҡтырмы, әммә был ысул эшләй, тиҙәр...

Антуриумды “ир бәхете” тип тә атайҙар. Гөл ир-ат өсөн талис­ман, бетеү булараҡ уларға тормошта үҙ урындарын, бәхеттәрен табырға ярҙам итә. Антуриум мул тормош һәм яҡшы энергияны үҙе­нә тарта, яңғыҙаҡтарға парҙарын табырға булыша. Был гөлдөң “ҡатын-ҡыҙ бәхете” тип йөрөтөл­гәне лә бар. Ул гүзәл затты төрлө күңелһеҙлектәрҙән һаҡлаусы көслө бетеү, тиҙәр. Гөлдө тәр­биәләгән ҡатын-ҡыҙ ирекһеҙҙән үҙе лә иң яҡшы сифаттарҙы үҫтерәсәк, тирә-йүнгә нур сәсеп торасаҡ. Өйөгөҙҙө бәхет таш­ла­маһын өсөн матур гөлдәр үҫте­регеҙ! Һәр хәлдә, улар донъяғыҙҙы йәмләп, кәйефегеҙҙе күтәрер, йоҡомһораған хис-тойғо­лары­ғыҙҙы уятыр.

Динә АРЫҪЛАНОВА