Хеҙмәттәштәребеҙҙе ҡотлайбыҙ!

Бөгөн Өфөлә, "Башинформ" мәғлүмәт агентлығының конференц-залында Рәсәй матбуғаты көнөнә арналған тантаналы сара уҙҙы. Йола буйынса, бында республиканың матбуғат һәм киң мәғлүмәт саралары хеҙмәткәрҙәре, журналистар, нәшриәтселәр һәм полиграфистар йыйылды.

Баҫма, электрон киң мәғлүмәт сараларында, телевидение һәм радиола, интернет селтәрендә алып барылған һөнәри эшмәкәрлекте баһалау өсөн ойошторолған төрлө йүнәлешле конкурстарҙа республиканың бихисап журналистары төрлө наградаларға лайыҡ булды, шул иҫәптән беҙҙең хеҙмәттәштәребеҙ ҙә.

Терроризмға ҡаршы тематиканы яҡтыртыу йәһәтенән ойошторолған республика конкурсында “Башҡортостан” гәзите редакцияһы беренсе урынды яуланы, ә хеҙмәттәшебеҙ, журналист Рәшит Кәлимуллин республика матбуғатында “Алға” сәнәғәт-производство тибындағы иҡтисади зона эшмәкәрлеген яҡтыртҡан өсөн бәйгелә икенсе урынға лайыҡ булды.

Профсоюз тематикаһы буйынса материалдарға ойошторолған республика конкурсында “Иң яҡшы матбуғат баҫмаһы” номинацияһында башҡалар менән бер рәттән Стәрлетамаҡ ҡалаһының “Ашҡаҙар” гәзите лә еңеп сыҡты. Шулай уҡ “Ашҡаҙар”ҙы терроризмға ҡаршы тематиканы яҡтыртыуҙы социаль селтәрҙәрҙә, сайтта әүҙем ойошторған өсөн дә билдәләнеләр – был номинацияла баҫма икенсе урынға сыҡты, ә “Алға” иҡтисади зонаһы эшмәкәрлеген яҡтыртҡан өсөн – район гәзите икенсе урында. Баҫмаға хеҙмәттәшебеҙ, журналист, “Башҡортостан” гәзитенең махсус хәбәрсеһе  Рәмил Мансуров етәкселек итә.

Бер төркөм журналистар  юғары һөнәри эшмәкәрлеге өсөн Башҡортостан Башлығының Рәхмәт хатына, БР Матбуғат һәм киң мәғлүмәт саралары агентлығының Почет грамоталарына, Башҡортостандың Журналистар союзы дипломдарына лайыҡ булды. Шулай уҡ махсус хәрби операция барышында юғары профессиональ сифаттар күрһәткән хеҙмәт оҫталары ла билдәләнде.

Унан тыш, БР Матбуғат һәм киң мәғлүмәт саралары агентлығы Бөтә донъя башҡорттары ҡоролтайы менән берлектә Башҡортостандың дәүләт һәм республика халыҡтары телдәрен үҫтереүҙе яҡтыртыуға иғлан иткән конкурста ла бер төркөм республика баҫмалары билдәләнде: I урынды – “Башҡортостан ҡыҙы”, II урынды – “Аҡбузат”, III урынды “Шоңҡар” журналдары редакциялары яуланы. Шулай уҡ был тематика буйынса район гәзиттәре араһында алдынғылар бүләкләнде, интернет селтәрендә, телевидение һәм радиолағы әүҙем һөнәри эшмәкәрлеге өсөн коллективтар билдәләнде.

Хеҙмәттәштәребеҙҙе лайыҡлы еңеүҙәре менән ҡотлайбыҙ һәм артабан да һөнәри уңыштар теләйбеҙ!

Фото: автор һәм Рәмил Мансуров.