Бөтә яңылыҡтар
Йәмғиәт
24 Ғинуар , 15:37

Бар яҡлап та уңған ҡыҙ

Табип булырға хәл иткән ул.

Миләүшә Батталованың шәхси архивынан.
Фото:Миләүшә Батталованың шәхси архивынан.

Миләүшә Батталова – Сибай ҡыҙы. Ҡаланың Рамаҙан Өмөтбаев исемендәге башҡорт лицейында белем алғандан һуң Өфө дәүләт медицина университетының педиатрия бүлегенә уҡырға инә. Әүҙем һәм тырыш ҡыҙ II курста белем ала. Өфөнөң “Аманат” халыҡ бейеүҙәре ансамблендә шөғөлләнергә лә өлгөрә, шулай уҡ ГТО нормативтарын алтын миҙалға тапшырған, уҡыу йортонда үткән бөтә сараларҙа ла әүҙем ҡатнаша.

Былтыр Йылайыр районында ойошто­рол­ған “Аҫылташ” баш­ҡорт йәштәре мәғариф форумында ҡатнашып, яңы дуҫтар табып ҡына ҡалмаған, төрлө спикер­ҙарҙың сығыштарын тыңлап, ораторлыҡ оҫталығын арттырған. Иң мөһиме – үҙендә лидерлыҡ кеүек сифатын тәр­биәләү, йәштәр араһында төрлө йүнәлештә проекттар эшләп, грант яҡлау юлда­рын өйрәнеү, берҙәм командала эш итеү тәжрибәһен үҙләштергән.

– Ысынында “Аҫылташ” фору­мында үҫешкә ынтылған йәш­тәрҙе күреү, улар менән бер аралашыу майҙансығында булыу минең тормошҡа ҡара­шымды, фе­керҙә­ремде, хатта маҡсат­тарымды үҙгәртте тиһәң дә була. Мин яңыса фекерләй һәм уйлай башланым, алға ҙур пландар ҡу­йыу ҙа ҡурҡытмай, эштәрҙе ат­ҡарып сығыу өсөн көс һәм дәрт тә етерлек, фекер­ҙәштәрҙең булыуы, улар менән даими аралашыу оҡшай – быларҙың барыһы ла һине үҫтерә һәм ҡанатландыра.

Тәүге курста мин төп иғти­бар­ҙы уҡыуға ғына бирҙем. Бәлки, был дөрөҫтөр ҙә, сөнки медицина университетында белем алыу еңелдән түгел. Ты­рышлыҡ һәм алдыңа ҡуйылған маҡсат һинең хыялдарыңдың тормошҡа ашыуына этәргес аҙым булып тора.

Биш йәштән мин Сибайҙағы “Гөлдәр” халыҡ бейеү ансам­блен­дә (етәксеһе – Луиза Яхина) шө­ғөлләндем, артабан “Осҡон”, “Ын­йы­ҡай” халыҡ бейеү ансамблдә­рендә бейенем, Сибай сәнғәт мәктәбенең хореография класын тамамланым. Шул тиклем бейер­гә яратам, был – минең күңел торошом, булмышым. Әсәйемде бәләкәйҙән һәр саҡ аҡ халатта күреп, уны ниндәйҙер бер фәрештәгә оҡшата торғайным. Үҙемдең уның кеүек аҡ халат кейеп сирлеләрҙе дауалағым килде, унан күреп, тәүҙә ҡур­саҡтарыма укол һалырға өй­рәндем, аҙаҡ туғандарыма. Шуға күрә бейеү сәнғәте ни тиклем яҡын булһа ла, бала саҡ хыялыма хыянат итмәй, медицинаны һайлағанмындыр, – ти әңгәмәсем.

Миләүшәнең әсәһе Вәсилә Мөхәмәт ҡыҙы Сибай медицина училищеһын тамамла­ғандан алып Сибай ҡала дауахана­һында шәфҡәт туташы булып эшләй. Уның хеҙмәт кенәгә­һендә бер генә яҙыу бар.

– Ҡыҙымдың медицина өлкә­һен һайлауына шул тиклем шатмын. Бәләкәйҙән ныҡ тырыш булды. Һәр саҡ “һинең кеүек аҡ халат кейәм” тип йөрөүөнә тәүҙә бер аҙ көлөп ҡараһам, үҫә төшкәс, уның ысынлап табип булырға те­ләүен аңланым. Мәктәпте лә яҡ­шы билдәләргә тамамланы, бюджет нигеҙендә уҡырға инде. Әйт­кәндәй, уның атаһы ла – аҡ халат­лылар рәтенән, Иҫке Сибай ауы­лында оҙаҡ йылдар теш табибы булып эшләй, – ти Вәсилә Батталова.

Киләсәктә кем – балалар табибы, әллә терапевт, кардиолог булырмы, әлегә аныҡ ҡына әйтеп тә булмайҙыр, сөнки Гиппократ антын биреүселәр уҡыу йортон төрлө йүнәлештәге табип булараҡ тамамлай, әммә шуныһы асыҡ: Миләүшә Марсель ҡыҙы киләсәктә үҙе һай­лаған һөнәренә тоғро ҡалыр тип ышанам. Ә күңеле бейеү көҫәгәндә уның сәхнәләрҙе дер һелкетеп бейеп алырға мөм­кинлек табыр, моғайын.

 
Кәримә УСМАНОВА

Сибай ҡалаһы.

Читайте нас в