Бөтә яңылыҡтар
Йәмғиәт
24 Ғинуар , 15:36

Ир бала – ил киләсәге

Афарин! Берәү, әммә берәгәй ул беҙҙең Фәнзил!

Заман башҡа – заң башҡа, тигәндәй, халыҡ араһында “Эй, хәҙерге йәштәр беҙгә етмәй инде”, тигәнерәк фекерҙәрҙе йыш ишетергә тура килә. Мин, оҙаҡ йылдар үҫмер егеттәр менән эшләгән кеше булараҡ, йәш быуынды уҡыу яғынан да, дөйөм ятаҡта йәшәү йәһәтенән дә күҙәтеп, был һүҙҙәр менән килешеп бөтмәйем. Ошо фекеремде ҡеүәтләп, Өфө статистика, информатика һәм иҫәпләү техникаһы колледжының IV студенты Фәнзил Назаров тураһында һөйләргә теләйем.

Фәнзил Ейәнсура районы­ның Байыш ауылында тыуып үҫеп, мәктәпте тамам­лағандан һуң беҙҙең колледжға уҡырға инде. “Булыр бала – бишектән” тигәндәй, үҙен I курстан уҡ һәр яҡлап һәләтле студент, бул­дыҡлы егет, тоғро иптәш итеп танытты. II курстан старосталыҡ бурысын еренә еткереп, ҙур яуаплылыҡ менән башҡара. Егеттә ойоштороу һәләте ярылып ята: бер ваҡытта ла тауыш күтәрмәҫ, кәрәк саҡта эшкә ҡуша, ойоштора белә. Үҙе ифрат оҫта ҡуллы – ҡулында һәр ваҡыт төрлө эш ҡоралы булып, һәр ғәмәлде белеп, теүәл башҡара. Үҙе уҡыу менән бер рәттән колледжда һөнәре буйынса эшләп тә йөрөй: хеҙмәте лә яйлы, уҡыуы ла яҡшы.

Оҙаҡ йылдар дауамында егеттәр менән эшләү тәжрибәмә таянып, шуны әйтә алам: ғәҙәттә, тап ошондай йәштәр һуңынан матур ғаилә башлығы, оҫта белгес булып китә.

Фәнзилдәге ысын ир-егет сифаттары ҡайҙан килә? Әлбиттә, ғаиләнән, ул атаһынан һәм әсәһенән үрнәк ала. Атаһы Фәнис Мөхәмәт улы – һөнәре буйынса урмансы, үҙҙәренең ауылында фермер булараҡ эшен ойош­торған. Әсәһе – белеме буйынса тәрбиәсе, әлеге ваҡытта Байыш ауыл биләмәһе хакимиәтендә эштәр идара­сыһы. Ошо аҡыллы ата-әсә ҡулында берҙән-бер бала булып үҫеүенә ҡарамаҫтан, Фәнзил бәләкәйҙән эш менән мәшғүл була. Атаһы менән әсәһе улдарын бер бөртөк тип артыҡ алдынан алмай, кәрәк саҡта һайлау мөмкинлеге лә бирә.

Фәнзил II курсты тамам­лағас, геология разведкаһында ярҙамсы булып эшләп тә алды. Шуныһы ҡыуаныслы: ул бер эштән дә ҡурҡмай, ихлас тотона, һәр бурысты еренә еткереп үтәй.

Эшһөйәрлек ул бит әле ныҡлы һаулыҡ та талап итә. Тәрбиәләнеүсем спорт менән әүҙем шөғөлләнә: ҡышын саң­ғыла йөрөй, йәйен Ҡаҫмартта һыу инә, айырыуса бесән эшләгәндән һуң был әйтеп аңлатҡыһыҙ көс бирә, ти ул. Әйткәндәй, быйыл атаһы менән ете эҫкерт бесән әҙерләгәндәр, атаһы ҡыуанысынан мал һанын арттырырға ҡарар иткән. Шунан Фәнзил тураһында нисек, бер бала, әммә берәгәйле бала, тип әйтмәйһең инде?!

Тәрбиәләнеүсемә һәр йәһәт­тән уңыштар, бәхетле киләсәк телә­йем, ә ата-әсәһенә шундай ла­йыҡ­лы, аҡыллы ул үҫтер­гәндәре өсөн колледж етәксе­леге һәм үҙем­дең исемдән рәхмәт белдерәм!


Зөлфиә АБДУЛЛИНА

Читайте нас в