"Беҙ булғанда шаулар әле ауылым урамдары..."

500-ҙән ашыу кеше йәшәгән Әбүбәкер ауылы быйыл “Ҙур ауылдар” номинацияһында “Айыҡ ауыл” республика конкурсында район данын яҡлай. Бында тырыш һәм әүҙем кешеләр йәшәй: фестиваль шуға асыҡ миҫал.

Хәйбулла районы башҡорттары ҡоролтайы төркөмөндә хәбәр итеүҙәренсә, сарала райондың йөҙҙән ашыу әүҙем ҡыҙы һәм егете ҡатнашҡан.

“Осрашыуҙың тап Әбүбәкерҙә уҙғарылыуы осраҡлы түгел. Ул - районда именлек, айыклыҡ биләмәһе тип танылған ауылдарҙың береһе. Ауыл биләмәләре алты командаға бүленеп, үҙ-ара таҫыллыҡта, мәргәнлектә һәм етеҙлектә көс һынашты. Сиратлап, ваҡытҡа быйма ташлауҙа хужаларға етеүсе булмаһа, уҡтан атыуҙа Өфө һәм Һамар ауыл биләмәләре командалары алдынғылыҡты бирмәне. Бер саңғыла бер юлы бер нисә ҡатнашыусы тороп ярышыуҙа, әлбиттә, команданың берҙәмлеге, бер-береһен тойоуы мөһим. Был һынауҙы Ивановка, Бүребай һәм Татыр-Үҙәк ауылдары йәштәренең командаһы яҡшы үтте. Арҡан тартышыуҙа Сиҙәм, Таналыҡ һәм Маҡан йәштәренә етеүсе булмаһа, ҡаршылыҡтар менән йүгереүҙә Аҡъяр һәм Яңы Ергән командалары иң етеҙҙәре булды.

Бынан тыш, уҡ атыу һәм тиҙлеккә санала команда ағзаларын һөйрәп ярышыуҙа бөтә командалар ҙа яҡшы һөҙөмтә күрһәтте. Сараның икенсе өлөшөндә йәштәр райондың төрлө өлкәләрҙә эшләп уңыш ҡаҙанған һәм шул уҡ ваҡытта сәләмәт тормош алып барған йәштәре менән йәнле һөйләшеүҙә ҡатнашты. Уңышлы йәш эшҡыуарҙар Гөлсәсәк һәм Илшат Дәүләтҡоловтар, район советы депутаты, әүҙем йәмәғәт эшмәкәре Тимур Ҡарасов һәм һәләтле йәш педагог Рәлиә Ғәзизова уңыш серҙәре менән уртаҡлашты, йәштәрҙе әүҙем һәм сәләмәт булырға саҡырҙы. Аҡъяр үҙәк дауахана табибы, Әбүбәкер ҡыҙы Айгөл Сынбулатова йәштәр алдында алкоголле эсемлектәрҙең зыяны һәм сәләмәт тормош алып барыуҙың өҫтөнлөктәре хаҡында сығыш яһаны.

Бик күңелле һәм файҙалы үтте осрашыу. Йәштәр менән бергә ауыл биләмәһе хакимиәттәре вәкилдәренең ҡатнашыуы был тәжрибәнең башҡа ерҙәрҙә таралыуына ла булышлыҡ итер, тип ышанабыҙ”, –  тип яҙа хәйбуллалар.

Фото: Хәйбулла районы башҡорттары ҡоролтайы  төркөмө.