Ҡашҡаҙанды хәҙер танымаҫһың да!

Ҡашҡаҙан – Өфөнөң Сипайлово биҫтәһендәге күл. Ул Ҡариҙел йылғаһының уң яғында урынлашҡан. Был – тәбиғи һыу ятҡылығы. 2002 йылда күлде “мәҙәниләштереү” маҡсатында “Ҡашҡаҙан” ял һәм мәҙәниәт паркы булдырыла. 

2022 йылда был биләмәне төҙөк­ләндереү баш ҡаланың йөҙөн тағы ла күркәмләндереп ебәрҙе. Был ғына түгел, күлдең эргә-тирәһен матурайтҡас һәм йәмәғәт киңлеген яңыртҡас, “Ҡашҡаҙан” Рәсәйҙә һыу ятҡылығында урынлашҡан иң яҡшы паркка әйләнде.

Белеүебеҙсә, паркты реконструкциялау республика Башлығы Радий Хә­бировтың ҡушыуы буйынса башланды. Күлдең төбө тулыһынса таҙартылды, бының өсөн тәүҙә һыу ятҡылығы ҡоротолдо, 40 мең тирәһе йөк ләм, бысраҡ һәм көнкүреш сүп-сары сығарылды, тәрәнәйтеү һәм башҡа эштәр атҡарылды.

Күлдән алыҫ булмаған шәхси секторҙан аҡҡан һыу Ҡашҡаҙандың экологияһына хәүеф менән янай ине. Төҙөкләндереү барышында күл яры буйлап таҙартыусы экран һәм ағын һыу канализацияһы төҙөлдө. Ул ямғырҙы, шәхси йорттарҙан аҡҡан һыуҙы йыйып, Маршал Жуков урамындағы коллек­торға түгә.

Күл буйын үҙгәртеп ҡороу бер нисә этаптан торҙо. Уның беренсеһе 2020 йылда старт алғайны. Төҙөүселәр инженер коммуникациялары үткәрҙе, яр буйын ипкә килтерҙе, яңы ағастар һәм ҡыуаҡтар ултыртты.

Икенсе этапҡа 2021 йылдың аҙа­ғында тотондолар. Яр һыҙатында металл каркаста ҡарағастан пирстар урынлаштырылды. Паркта амфитеатр, ял зонаһы, балалар һәм спорт майҙансығы, яҡтыртыу һәм видеокүҙәтеү системалары булдырылды. Күл уртаһындағы заманса музыкаль фонтан төп һыу объекттарының береһенә әйләнде.

Былтыр Рәсәй һәм Ҡала көнөндә яңыртылған “Ҡашҡаҙан” паркында “... тиклем ике аҙым” проекты старт алды.  Ул 2024 йылда билдәләнәсәк Өфө ҡалаһының 450 йыллыҡ юбилейына арналды.

Тамашасыларға “Мираҫ” фольклор ансамбле башҡарыуында “Заятүләк һәм Һыуһылыу” халыҡ эпосына таянып әҙерләнгән “Ҡашҡаҙан легендаһы” хореография композицияһы тәҡдим ителде. Һуңынан паркка һауа шарында баш ҡала символы – һыуһар осоп килде һәм күл төбөнә төштө. Өфөләрҙе тантаналы ваҡиға менән ҡотларға Башҡортостан Башлығы Радий Хәбиров та килде.

Шулай итеп, бында балалары менән килгән әсәйҙәр өсөн дә, ололарға ла ял итеү мөмкинлеге тыуҙырылды. Спортсыларға ла уңайлы урындар хәстәрләнгән. Һыу буйында ял итергә яратыусылар ҙа паркты оҡшатты.

Үҙенә күрә рухи көс алыу, ял итеү урынына, иң матур паркка әйләнде Ҡашҡаҙан буйы. Хәҙер ул – йылдың төрлө миҙгелендә үҙенә йәлеп итеп торған сихри урын. Тиккә генә “Йыл паркы” номинацияһында еңеп сыҡ­маған!

Айһылыу НИЗАМОВА