Бөтә яңылыҡтар
Йәмғиәт
31 Ғинуар 2023, 15:13

Үҙ өлгөһөндә тәрбиәләй

Ватансылыҡ дәрестәре үтә.

Вәсил Исмәғилевте Мәләүез районын­да күптәр белә. Ул тирә-яҡта оҫта педагог һәм абруйлы остаз булараҡ танылған. Янып эшләгән уҡытыусыларҙың береһе йәштәрҙә белемгә һәм яңы асыштарға ынтылыш уята. Үҙенең өлгөһөндә балаларҙа илһөйәрлек хисе тәрбиәләй.

– Хәрби бурысымды Ырымбур өлкәһенең Тоцк ҡалаһында үткән быуаттың 80-се йылдар аҙағында танк ғәскәрендә үтә­нем, – тип иҫкә ала Вәсил Муса улы. – Унда ысын ир-егеттәр мәктәбен үттем.

Армияға ҙур теләк менән бара ул. Башҡорт дәүләт университетында физика факуль­те­тының тәүге курсын тамам­лағас, йәш егеткә повестка тотторалар. Вәсил “Т-54” танкы­һында хеҙмәт итә. Экипаж дүрт кешенән тора – капитан, ҡорал төҙәүсе, водитель-механик һәм заряд ҡоролмаһы менән идара итеүсе. Күнекмә ваҡы­тында сәп­кә атыуҙа яҡшы һөҙөмтә күрһәт­кәс, уны ҡорал төҙәүсе итеп ҡуя­лар.

 – Әрмелә хеҙмәт итеү өсөн физик әҙерлек менән бер рәттән белемле, рухи яҡтан көслө, илһөйәр булыуың да мотлаҡ, – ти әңгәмәсем. – Ил һағында тороу ир-егет өсөн бик кәрәк. Ул минең өсөн, ысын мәғәнәһендә, тормошҡа әҙер­лек осоро булды. Хәрби хеҙмәттә физик көс кенә түгел, ә зирәклек, таһыллыҡ, сос­лоҡ та талап ителә. Икенсе­нән, белемле булыу зарур. Теорияны, ҡорал үҙенсәлектәрен, Уставты, төн уртаһында уятһа­лар ҙа, яттан белеү мотлаҡ. Хеҙмәт­тәштәрем менән әле лә аралашып  торабыҙ, “Бәйләнеш­тә” социаль селтәре аша ныҡлы бәйләнеш тотабыҙ. Оло улым да хеҙмәт итеп ҡайтты, кесеһе лә барыр тип уйлайым, –  ти Вәсил Исмәғилев.

Яҡташымдың атаһы Муса Ғайса улы Бөйөк Ватан һуғы­шында ҡатнашҡан, дәһшәтле юлдар үткән. Үҙенең өлгөһөндә ысын илһөйәрлек ниндәй булға­нын күрһәткән. Хәҙер инде Вәсил Муса улы уҡыусыларына шундай һабаҡ бирә.

Йәш техниктар станция­һында 767 бала шөғөлләнә, киләһе йылда уларға “Осоусы робот техникаһы” йүнәлеше буйынса тағы 90 бала ҡушыласаҡ. Йәш быуындың яңы технологиялар һәм хәрби йүнәлеш менән ҡы­ҙыҡ­һыныуы, төрлө конкурс­тарҙа ҡатнашып, Мәләүезде данлауы бигерәк тә яҡшы.

Илһөйәрлек дәресе даими үтәсәк. Ветерандар менән ос­рашыуҙар балаларға бик кәрәк. Улар тыуған илдең патриоттарын тәрбиәләргә, шулай уҡ интернациональ бурысын намыҫ ме­нән үтәгән һалдаттарҙы онотмаҫҡа ярҙам итә.


Гөлназ САЛАУАТОВА

Читайте нас: