Учалынан хуш еҫле үлән сәйе!

Учалы районының Рысай ауылы халҡы ла махсус хәрби операцияла ҡатнашҡан егеттәрҙе ярҙамдарынан өҙмәй. Ауылдың ҡатын-ҡыҙҙар советы рәйесе Таңһылыу Фәизова әйтеүенсә, улар һалдаттарға былтыр апрель айынан алып даими посылкалар  ебәреп тора.

-Мәҫәлән, Яңы йылға йылы драптан тегелгән бейәләй һәм бирсәткәләр, тәм -том күстәнәстәр, изге теләктәр яҙылған хаттар, Рысай урта мәктәбенең уҡыусыларының һүрәт-хаттарын һалдыҡ. Ә бына был юлы  Рысай ауылының ҡатын -ҡыҙҙар советының ағзалары махсус хәрби операцияла ҡатнашыусы һалдаттарыбыҙға шифалы уләндәр ҡатнаштырылған фитосәй әҙерләне. Был сәйгә үҙебеҙҙең Учалы ялан - ҡырҙарында үҫкән хуш еҫле мәтрүшкә, кейәү үләне, клевер сәскәләре, ҡарағат, боланут япраҡтары ҡушылған. Рысай һылыуҙары беҙҙең һалдаттарыбыҙға тыуған яҡтан йыйылған шифалы улән сәйе һаулыҡ, көс, дошманды тиҙерәк еңеп ҡайтыуға дәрт биреренә шикләнмәй. Ошо фитосәйҙе әҙерләү өсөн шифалы үләндәр килтергән Рысай урта мәктәбе уҡыусыларына һәм уҡытыусыларына рәхмәтлебеҙ, -тине ул.

“Ил төкөрһә, күл була” тигән халыҡ. Махсус хәрби операциялағыларға күрһәтелгән дөйөм ярҙамға учалылылар ҙа тос өлөшөн индерә.

Фото: Таңһылыу Фәизова архивынан.