Радий Хәбиров һәләк булғандарҙың ғаиләләре менән осрашты

3 февралдә Йәрмәкәй районында Башҡортостан Башлығы Радий Хәбиров махсус хәрби операцияла һәләк булған Александр Пургиндың, Иван Кукушкиндың һәм Сергей Прокофьевтың ғаиләләре менән осрашты.

Аралашыу барышында Радий Хәбиров яҡындарының ҡайғыһын уртаҡлашты һәм лайыҡлы улдар – ысын патриоттар һәм Ватанды һаҡлаусылар тәрбиәләгәндәре өсөн ата-әсәләргә рәхмәт әйтте.

– Беҙҙең төп бурыс – улар хаҡында онотмау, уларҙың ата-әсәләрен, ҡатындарын һәм балаларын  иғтибар менән солғап алыу һәм даими хәстәрлек күреү, - тип һыҙыҡ өҫтөнә алды Радий Фәрит улы.

Республика Башлығы һәләк булған яугирҙәрҙең ғаиләләренә Шайморатов орденын тапшырҙы, ул егеттәргә үлгәндән һуң  батырлыҡ һәм ҡаһарманлыҡтары өсөн бирелде. Александр Пургиндың ата-әсәһе – Клавдия Ивановна Һәм Владимир Анисимович, Иван Кукушкиндың ата-әсәһе – Александр Иванович һәм Галина Алексеевна, Сергей Прокофьевтың ата-әсәһе – Владимир Сергеевич һәм Ләлә Ринат ҡыҙы, шулай уҡ уның ҡатыны Екатерина республика етәкселегенә иғтибар һәм ярҙам өсөн рәхмәт белдерҙе.

Төбәк етәксеһе хәрби хеҙмәткәрҙәрҙең ата-әсәләренә республика кардиология диспансерында дауаланыу һәм реабилитация курсын үтергә тәҡдим итте.

Радий Хәбиров шулай уҡ Йәрмәкәй районы хакимиәте башлығы Илшат Раймановҡа һәләк булған егеттәрҙең иҫтәлеген мәңгеләштереү буйынса саралар күрергә, уларҙың тыуған ауылдарында мемориаль таҡтаташтар ҡуйырға ҡушты.

Һәләк булғандарҙың ғаиләләре теләгән ваҡытта урындағы хакимиәткә мөрәжәғәт итә ала, унда уларға мотлаҡ ярҙам итәсәктәр, тип билдәләне Башҡортостан Башлығы. Бының өсөн төбәктә киң ярҙам саралары комплексы эшләй.

Сығанаҡ: glavarb.ru/rus/press_serv/novosti/161500.html