Нуримандарҙа илһөйәрлекте тойҙоҡ

Илһөйәрлек, тыуған илеңә, тыуған ереңә файҙа килтереү тойғоһо бөгөн айырыуса ныҡ баһаланған заманда халыҡ та берҙәмерәк була барған һымаҡ.

Нуриман районына бөгөнгө командировкабыҙҙың төп маҡсаты ошондай замандаштарыбыҙ менән осрашыу ине. Быға миҫалдарҙың төрлөһөн килтерергә мөмкин булыр ине.  “Атайсал” проекты сиктәрендә Нимесләр ауылында Әлфирә Нурғәлиева башланғысы менән ауылдаштар дәррәү күтәрелеп, ауыл эргәһендәге шишмәне төҙөкләндереп ҡуйған. Элек һарҡып ҡына аҡҡан шишмәнең юлын асып, тирә-яғын матурлап күркәм төҫ биргәндәр. “Был сараға ситтә йәшәгән яҡташтарыбыҙ ҙа ярҙам ҡулы һуҙҙы”, - тип ауылдаштарының бер төптән булыуҙарына рәхмәтен белдерҙе был эштең башланғысында торған ханым.

Байгилде ауылында урындағы  ветерандар советы рәйесе Рәлиә Әхтәмйәнова рәйеслегендә махсус хәрби операцияла ҡатнашыусы егеттәргә даими ярҙам ойошторолоуы тураһында ла белдек. Рәлиә Тимерйән ҡыҙы тәүге өмәне үҙенең йортонда үткәрә, гүзәл заттарҙы йыйып, һигеҙ тоҡ һарыҡ йөнөн таҙартып, иләп, ҙур эш башҡарғандар. Йылы ойоҡбаш, бирсәткәләр бәйләүҙә тағы ла күберәк ҡатын-ҡыҙ ҡатнашҡан. Бер тапҡыр посылка оҙатыу менән сикләнмәй улар. Икенсегә ошондай ҙур өмә Ҙур Теңкәш ауылында Мәрйәм Әғзәмова йортонда ойошторола. Был эштәрҙә хатта 96 йәшлек Нәзифә апай Сәйфетдинованың да ҡатнашыуы тураһында һөйләнеләр. Махсус хәрби операциялағы егеттәргә ярҙам буйынса яңы пландары менән дә бүлеште Байгилде, Ҙур һәм Бәләкәй Теңкәш ауылдары уңғандары.

Уҡытыусы һәм остаз йылы уңайынан ошо өлкәләге һөнәр эйәләре менән дә таныштыҡ, тырышып донъя көтөүсе йәш ғаиләләрҙе күрҙек  һәм, әлбиттә, Нуриман районының гүзәл тәбиғәтенә лә һоҡланып ҡайттыҡ.

Был төбәк  тураһында мәҡәләләр гәзитебеҙҙең киләһе һандарында донъя күрер.

Автор фотолары.