"Таяныс" булһын таяныс

Күптән түгел Хәйбулла районында "Таяныс" йәмәғәт ойошмаһы барлыҡҡа килде. Ул махсус хәрби операцияла ҡатнашыусыларҙың ҡатындарын һәм әсәләрен берләштерә. Был ойошманы төҙөү инициативаһы менән мобилизацияланған ҡатындарҙың береһе сыҡты. Район ҡатын-ҡыҙҙар советы йәмәғәт ойошмаһын үҙ ҡанатына алып, һәр яҡлап ярҙам күрһәтеү, төрлө социаль хеҙмәттәр һәм структуралар белгестәрен йәлеп итеү ҙә күҙ уңында тотола.

"Таяныс" берләшмәһенең тәүге осрашыуы үтте. Тәүге осрашыу райондың Ғаилә хеҙмәте нигеҙендә ойошторолдо. Осрашыу барышында хәрби хеҙмәткәрҙәрҙең ғаиләләренә ярҙам саралары, консультациялар үткәрелде, яугирҙәрҙе реабилитациялау мәсьәләләре буйынса аңлатмалар бирелде. Осрашыуҙа ҡатнашыусылар ҡыҙыҡһындырған һорауҙарын бирҙе, тәҡдимдәре менән уртаҡлашты.  Берләшмәлә ҡатнашыусылар һәр кесаҙна осрашасаҡ.

Фото: vk.com/wall204450240_1471