Бөтә яңылыҡтар
Йәмғиәт
10 Февраль 2023, 09:26

Яугирҙәр нимәгә мохтаж?

Тотош республика халҡы уртаҡ эш өсөн берләште.

Автор фотолары.
Фото:Автор фотолары.

Дәүләт Йыйылышы – Ҡоролтайҙа “Махсус хәрби операцияла ҡатнашыусыларҙы амунициялар һәм башҡа кәрәкле тауар менән тәьмин итеү” мәсьәләһе буйынса кәңәшмәлә республика халҡының махсус операцияла әүҙем ҡатнашыуы, яугирҙәребеҙҙе тәьмин итеү мәсьәләләре ҡаралды. Унда төрлө министрлыҡ һәм ведомство вәкилдәре, хәрби зонала ихтыяж булған тауар етештереүселәр, шулай уҡ   М. Шайморатов һәм А. Доставалов исемендәге ирекле батальондарҙың хәрбиҙәре ҡатнашты.

 

Терәк төбәктәрҙең береһе

 

Сара алдынан Дәүләт Йыйылышы Палатаһы фойеһында урындағы етештереүселәрҙең тауар күргәҙмәһе ойошторолдо. Унда махсус хәрби операцияла талап ителгән һәм Башҡорт­останда етештерелгән төрлө формалы кейем, камуфляж селтәрҙәре, палаткалар, махсус бишмәттәр, аяҡ кейеме һәм башҡа тауарҙар тәҡдим ителде.

Дәүләт Йыйылышы – Ҡорол­тай Рәйесе Константин Толкачев һәм кәңәшмәлә ҡатнашыусылар күргәҙмәгә ҡуйылған әйберҙәр менән танышты.

– Бөгөн илебеҙ дәүләт мән­фәғәттәрен яҡлау, яңы билә­мәләрҙе һаҡлау өсөн барлыҡ көстәрҙе һәм сараларҙы туплай. Башҡортостан – терәк төбәк­тәренең береһе. Был республика халҡының махсус операцияла әүҙем ҡатнашыуына ла, тылдағы тәьминәткә лә ҡағыла. Меңәр­ләгән ватандашыбыҙ махсус хәрби операцияла ҡатнаша. Улар – ирекмәндәр, мобилиза­цияланғандар. Егеттәргә еңел­дән түгел. Ә беҙҙең маҡсат – уларҙың яуаплы бурыстарын үтәүҙе мөмкин тиклем еңе­ләйтеү, – тине Константин Толкачев, ултырышты асҡанда.

Константин Борисович билдә­ләүенсә, һалдаттар төп форма, шулай уҡ өҫтәмә экипировка һәм амунициялар менән дә тәьмин ителгән, сөнки улар хәрби шарттарҙа тиҙ арала ҡулланыуға яраҡһыҙға әйләнә.  Беренсе ярҙам күрһәтеү тупланмалары (аптечка), заманса техник күҙәтеү һәм элемтә саралары менән бәйле ҡыйынлыҡтар бар.

– Ғөмүмән, был өлкәлә ҙур эш алып барыла, әммә фекер алышыуҙы талап иткән мәсьәләләр бар, уларҙы хәл итеү өсөн бөгөн бында йыйылдыҡ. Беренсенән, махсус хәрби операцияла ҡатнашыусыларға нимә, ниндәй күләмдә талап ителеүен аныҡ ҡына аңларға кәрәк. Икенсенән, тауар тәғәйен урынға барып етһен өсөн, логистика сылбырын дөрөҫ төҙөү мөһим. Ҡыҙғанысҡа ҡаршы, ул һәр ваҡыт уңышлы килеп сыҡмай. Яңы йыл алдынан, мәҫәлән, беҙҙең депутаттар Луганск Халыҡ Республикаһындағы мәктәпкә туңдырғыс ебәрҙе, ә ул икенсе урынға киткән. Осона сыҡтыҡ, тәғәйен урынға яңынан ебәрҙек, әммә ҡыйынлыҡтар ҙа булды. Хәрбиҙәргә тәғәйен­ләнгән йөк менән дә шул уҡ хәл. Нисек кенә булмаһын, азат ителгән биләмәләргә ярҙамыбыҙ килеп еткәс, беҙ шатбыҙ – Ҡораллы Көстәребеҙҙең ниндәй­ҙер часына йәки урындағы халыҡҡа булһынмы. Шулай ҙа махсус хәрби операцияла ҡатнашыусыларға Башҡорт­остандан, теге йәки был ҡаланан йәки райондан ебәрелгән осраҡ­тарҙа йөктөң тәғәйен урынға барыуын теләр инек, – тине Константин Толкачев.

Башҡортостандың иҡтисади үҫеш министрының беренсе урынбаҫары Айрат Фәхретдинов махсус хәрби операцияла ҡатнашҡан республика граждандарына ярҙам күрһәтеү буйынса берҙәм логистика үҙәгенең эше менән таныштырҙы.

Башҡортостандың сәнәғәт, энергетика һәм инновациялар министры урынбаҫары Денис Гурков еңел сәнәғәт пред­приятиеларының мөмкинлектәре һәм уларҙың махсус хәрби операция ихтыяждарын ҡәнәғәт­ләндереүҙә ҡатнашыуы тура­һында хәбәр итте.

 

Республика халҡына рәхмәт

 

Хәрбиҙәрҙең үҙҙәре, махсус хәрби операцияла ҡатнашыу­сылар, гуманитар ярҙам буйынса теләктәр, шулай уҡ етештереүсе предприятиеларға тәҡдимдәрен әйтте. Хәрбиҙәрҙең квадро­коптерҙарға идара итеү өсөн ҡыҫҡа ваҡытлы курстар үткәреү кәрәклеге тураһында ла һүҙ барҙы. Шәхси тактик аптечка­ларҙы туплау, яугирҙәрҙе ярсыҡ­лы йәрәхәттәрҙән һаҡлау өсөн ышаныслы броня һаҡлағыстар менән тәьмин итеү һәм башҡа мәсьәләләр күтәрелде.

Сарала ялға ҡайтҡан яугирҙәр ҙә ҡатнашты һәм ярҙам туплауҙа ниндәй әйберҙәргә айырыуса иғтибар итергә кәрәк булыуы тураһында һөйләне.

– Тиңе булмаған ярҙам күрһәткәндәре өсөн республика етәкселегенә рәхмәт белде­рәбеҙ. Хәүефһеҙ урында тороп, дошмандың техникаһын һәм тере көсөн юҡ итеүҙә һөҙөм­тәлерәк һуғышыу, ҡайҙа тороуҙарын күреү өсөн беҙгә пилотһыҙ осоусы ҡорамалдар кәрәк. Унда ҡиммәтле квадро­коптерҙар кәрәкмәй, осһоҙ булһа ла бара, әммә күп булһын. Амунициялар яҡшы, уңайлы, әммә яу шарттарында уларҙы фай­ҙаланыу ваҡыты күпкә ҡыҫҡара, кейемдең көтөлмәгәндә юҡҡа сығыуы ихтимал. Аптечкаларҙың тулылығының тәьмин ителешенә иғтибар бирһендәр ине. Төндә ҡарау приборҙары (тепло­визорҙар) етмәй, был бик мөһим мәсьәлә.

Республика халҡы ысын кү­ңелдән ярҙам итә, ниндәйҙер әйберҙәр, ойоҡтар һәм башҡа кәрәк-яраҡ ебәрә – улар бик кәрәк, ҙур рәхмәт. Әммә үтә мөһим, яугирҙәрҙең ғүмерен, хәрби һәләтен тәьмин иткән, тәү сиратта талап ителгән саралар һыу һәм һауа кеүек кәрәк. Әлбиттә, беҙгә бындай ҡорамал­дар килә, әммә улар тиҙ сафтан сыға. “УАЗик”, “КамАЗ” кеүек машиналар ебәргәнегеҙ өсөн рәхмәт, улар шәхси составты йөрөтөү өсөн бик кәрәк. Гуманитар йөктө әҙерләгәндә лә кәрәкле әйберҙәр исемлеген төҙөп, улар буйынса туплап, барып етеүен контролдә тотһондар ине. Әгәр ул икенсе бүлексәгә китһә, гуманитар йөк талап ителгән яугирҙәр көткән әйбер­ҙәрен ала алмаясаҡ, – тине яугир.  

Кәңәшмәлә, процеста ҡат­нашыу­сыларҙың барыһы менән дә үҙ-ара эш итеүҙе берләш­терәсәк һәм координациялау функцияһын үтәйәсәк махсус эшсе төркөм булдырырға кәрәк, тигән һығымтаға килделәр.

Рәмилә МУСИНА

Читайте нас: