Өфө эргәһендәге "Йәштәр" һәм "Миловка паркы" торлаҡ комплекстары халҡы бөгөн ҙур һөйөнөс кисерҙе: яңы төҙөлгән мәктәп, ниһайәт, ишектәрен асты! Был яңылыҡты ата-әсәләр генә түгел, балалар ҙа күптән өмөтләнеп көтә ине. Шатлыҡлы ваҡиға менән ҡотларға Өфө районы хакимиәте, район советы вәкилдәре килде.
Дүрт ҡатлыҡ заманса мәктәп 1225 балаға иҫәпләнгән, дөйөм майҙаны – 18 мең квадрат метрҙан ашыу, ул – республикалағы иң ҙур мәктәптәрҙең береһе. Класс бүлмәләренән тыш, яңы уҡыу йортонда ике ҙур спорт залы, 500 урынлыҡ тамаша залы, кескәйҙәргә уйын бүлмәләре бар. Ризыҡты ла уҡыусыларға мәктәптең үҙ аҙыҡ-түлек блогында әҙерләйәсәктәр.
Балаларға төрлө яҡлап үҫешергә, белемдәрен киңәйтергә бында иркен шарттар тыуҙырылған. 3-D һәм галография кластары, интерактив ҡомлоҡ, интерактив өҫтәлдәр, малайҙарға – төрлө ир-ат һөнәренә өйрәнеү оҫтаханалары, ҡыҙҙарға тегеү, бәйләү, сигеү, аш-һыу әҙерләргә өйрәнеү өсөн махсус йыһазландырылған иркен бүлмәләр һәм башҡаһы. "Гармония" тип аталған яңы мәктәптең хатта үҙ планетарийы, телестудияһы, нәшриәт үҙәге буласаҡ! Ә киләһе уҡыу йылынан 2-се кластан алып уҡыусылар "Реаниматор" уҡыу-тренажер ҡоролмаһында беренсе ярҙам күрһәтеүҙе өйрәнә башлаясаҡ.
Мәктәп директоры Елена Голосееваның: "Мәктәптең исеме юҡҡа ғына "Гармония" түгел. Шул тиклем күп төрлө мөмкинлектәре, шарттары булған өр-яңы мәктәптә тырышып эшләйек, уҡыйыҡ. Ошо матур исемгә тап төшөрмәй, ата-әсәләр, педагогтар коллективы, уҡыусылар ҙа үҙ-ара гармонияла – аңлашып, татыу һәм дуҫ, бер ғаилә кеүек йәшәргә һәм уҡырға тырышайыҡ!" – тигәне менән залдағы ата-әсәләр ҙә, уҡыусылар ҙа килешеп, дәррәү алҡыштарға күмелде.
Изге юлға, "гармония"лар! Ҡатмарлы һәм мауыҡтырғыс Белем донъяһына сәйәхәтегеҙ шатлыҡтар менән сорналып аҡһын!
Д.Бикмырҙин һәм автор фотолары.