Парлы ғүмерҙәр йыр кеүек

Күгәрсен районының Бикбулат ауылы "Айыҡ ауыл" конкурсында ҡатнаша. Муниципаль этапта еңеү яулаған ауыл халҡы хәҙер республика кимәлендә көс һынай. 

Ауылда сәләмәт йәшәү рәүешен пропагандалаған, айыҡ тормош алып барыуға йүнәлтелгән төрлө саралар үткәрелеп тора. Яңыраҡ ауыл  мәҙәниәт йортонда оҙаҡ йылдар бергә татыу ғүмер иткән парҙарҙы тәбрикләгәндәр. Рәзифә менән Бикбулат Сафиндар, Фәнүзә менән Зәбир Тимербаевтар, Фатима менән Әбделлатиф Сафиндар, Фәниә менән Альберт Айҙарбәковтар – 45, 50 йыл буйы тормоштоң әсеһен-сөсөһөн бергә татып, татыу йәшәгән хеҙмәт ветерандары. 

Юбилярҙарҙы район һәм ауыл биләмәһе хакимиәттәре вәкилдәре, уларҙың балалары, туғандары һәм дуҫтары тәбрикләгән, урындағы артистар сығыштары менән кисәне биҙәгән. 

Балаларына матур тәрбиә биреп оло тормош юлына баҫтырған, йәштәргә тоғролоҡ, татыулыҡ, ғаиләләге берҙәмлек өлгөһө булып торған хөрмәтле парҙарға тағы оҙаҡ йылдар бәхетле ғүмер итергә яҙһын! 

Фотолар: район, ауыл төркөмдәренән.