"Улыбыҙҙы онотмаған өсөн рәхмәт"

Бөгөн Күгәрсен районының Түләбай ауылында Башҡортостан Башлығы Радий Хәбиров махсус хәрби операцияла һәләк булған һалдат, разведка ротаһының кесе сержанты Айҙар Айытҡужиндың ғаиләһендә булды. Рәсәй Президенты Владимир Путин Указы менән ул үлгәндән һуң хәрби бурысын үтәгәндә күрһәткән батырлығы һәм ҡаһарманлығы өсөн Батырлыҡ ордены менән бүләкләнгәйне.

Геройҙың ата-әсәһе Розалиә Сибәғәт ҡыҙы һәм Азат Әхәт улы Айытҡужиндар менән аралашҡанда Радий Хәбиров уларға ысын патриот тәрбиәләүҙәре өсөн рәхмәт белдерҙе. Республика етәксеһе ғаиләгә үлгәндән һуң ҡаһарманлығы өсөн наградланған улдарына Шайморатов орденын тапшырҙы.

– Һәләк булған егеттәрҙең ата-әсәләрен Республика кардиология үҙәгенә дауаланырға һәм реабилитация үтергә ебәрергә ҡарар иттек. Унда махсус программа төҙөлгән. Һеҙгә лә ошо мөмкинлектән файҙаланырға, һаулығығыҙҙы нығытырға тәҡдим итәм, – тине Радий Хәбиров. – Беҙ улығыҙ һәм хәрби бурысын үтәгәндә һәләк булған башҡа егеттәр хаҡында бер ҡасан да онотмаясаҡбыҙ.

Айҙар Айытҡужиндың ата-әсәһе белдереүенсә, район властары һәм ауылдаштары уларҙың ғаиләһен иғтибарһыҙ ҡалдырмай, егеттең хеҙмәттәштәре лә килеп йөрөй.

– Улыбыҙ иҫтәлегенә Семёнов-Петровский мәктәбендә мемориаль таҡтаташ урынлаштырылды, район хакимиәте үтенестәребеҙгә һәр саҡ яуап бирә. Барыһына ла улыбыҙ хаҡында хәстәрлек күреүҙәре һәм иҫтәлектәре өсөн рәхмәт, – тине Азат Әхәт улы һәм Розалиә Сибәғәт ҡыҙы.

Фото: Башҡортостан Башлығы сайты.