Рәсәй Студент отрядтары, йәштәр ойошмаһы булараҡ, 1959 йылда Рәсәй Мәғариф министрлығы ярҙамында булдырылған.
Студент отрядтары – эшкә урынлашыу мөмкинлеге лә, яңы белемгә һәм тәжрибәгә эйә булыу сараһы ла, тормош мәктәбе, асыш-тәьҫораттар, ижад осоро, дуҫтар һәм фекерҙәштәр берләшмәһе лә.
Юғары һәм урта профессиональ уҡыу йорттары студенттары өсөн уҡыуҙан буш ваҡытта (ҡағиҙә булараҡ, йәйге һәм ҡышҡы каникулда) төрлө сәнәғәт һәм ауыл хужалығы объекттарында, шулай уҡ хеҙмәтләндереү өлкәһендә (ҡунаҡхана комплекстарында һәм алыҫ араға йөрөгән поездарҙа), балалар лагерҙарында, шифаханаларҙа вожатыйҙар, тимер юлдарҙы оҙатыусы булып эшләү өсөн ваҡытлыса хеҙмәт коллективтары ойошторолған.
Студент отрядтарының эшмәкәрлеге йәштәрҙе уҡыған осорҙа ла, уҡыу йорттарын тамамлағас та ваҡытлыса һәм даими эшкә урынлаштырыуға булышлыҡ итеүҙән ғибәрәт. Был хәрәкәт йәштәргә патриотик тәрбиә биреүҙә, студент отрядтары хәрәкәте традицияларын һаҡлауҙа һәм үҫтереүҙә, халыҡ араһында мәҙәни һәм социаль әһәмиәтле эште башҡарыуҙа ла ҙур роль уйнай, шулай уҡ Рәсәй иҡтисадының төрлө тармаҡтары өсөн кадрҙар резервын булдырыуға ла булышлыҡ итә.
Студенттар отрядының дүрт төрө эшләй. Төҙөлөш отрядтары йәйге осорҙа хужалыҡ ойошмалары менән хеҙмәт һәм подряд килешеүҙәре нигеҙендә төҙөлөш-монтаж эштәрен башҡара. Вагон ҡараусылар (проводниктар) отрядтары иһә тимер юлда пассажир вагондарын хеҙмәтләндерә. Педагогик отрядтар балаларҙың йәйге һауыҡтырыу лагерҙарына юллана. Сервис отрядтары иһә төрлө хеҙмәттәр күрһәтеү йүнәлештәрендә эшләй: сауҙа, туризм, пропаганда тармағында, промоутер, стюардесса һәм башҡалар.
Бөтә Рәсәйҙә студенттарҙың яҡынса 240 мең отряды балалар, ололар, инвалидтар өсөн төрлө файҙалы эштәр башҡаралар, поезда, шифаханала, лагерҙа эшләйҙәр. Беҙҙең университетта ла студенттар эшһеҙ ултырмай: төрлө саралар ҙа үткәрәләр, кешеләргә лә ярҙам итәләр.
Өфө фән һәм технологиялар университетының Стәрлетамаҡ филиалында студенттар түбәндәге отрядтарҙа тырышып эшләй: “Стерх” проводниктар отряды, “Гефест” төҙөлөш отряды, “Беренсе орден” педагог отряды, “Аҡбуҙат” ҡар десанты отряды, “Арфа” сервис отряды.
2022 йылда ғына улар ҡалала күп сара үткәрҙе, үҙҙәре лә төрлө ҡалаларға барып ҡатнашты. Мәҫәлән, “Аҡбуҙат” отряды Стәрлетамаҡтың 36-сы балалар баҡсаһы ихатаһын ҡарҙан таҙартты. Был ҙур ярҙам, сөнки ата-әсәләр һәм балалар өсөн тирә-яҡ мөхиттең хәүефһеҙ булыуы бик мөһим.
Былтыр йәштәр Рәсәй студент отрядтары көнөнә “Юлдаш” радиоһына барып, ошо хәрәкәт ветераны Рөстәм Сабир улы Туҡаев менән студент отрядтарының элекке һәм бөгөнгө традициялары тураһында һөйләштеләр. Бөгөнгә булған эш планын һәм йәйге осорҙа эшкә урынлаштырыу мәсьәләһен тикшерҙеләр.
Шулай уҡ университет студенттары “Яңы кешеләр” партияһы менән берлектә “Ҡарлы фитнес” акцияһын ойошторҙо. 31-се балалар баҡсаһы, Өфө фән һәм технологиялар университетының Стәрлетамаҡ филиалы колледжы, спорт комплексы ихаталарын ҡарҙан таҙартты.
23 февралгә һәм 8 мартҡа арналған саралар ҙа даими үткәрелә. “Беҙ төрлө! Беҙ шәп!” интеллектуаль викторинаһын ойоштороп, отрядтар үҙ-ара ярышты.
“Аҡбуҙат” отряды университеттың төп корпусында, “Хәстәрлек” акцияһына ярашлы, Луганск һәм Донецк халыҡ республикаларынан мәжбүри күсеп килгәндәр өсөн гуманитар ярҙам йыйҙы.
“Арфа” сервис отряды иһә төрлө студент отрядтары ағзалары өсөн “Своя игра” форматында викторина үткәрҙе. Шулай уҡ студент отрядтары төп корпус эргәһендәге биләмәне таҙартыу буйынса өмәләр ойошторҙо. Йәштәр сүп-сарҙы, былтырғы япраҡтарҙы йыйҙы, майҙанды һәм юлдарҙы таҙартты. Рәсәй студенттары отрядтары гранты положениеһына ярашлы, 100 студент йәйге лагерҙарҙа вожатый булып эшләр өсөн педагогика, психология нигеҙҙәрен өйрәнә. Буласаҡ вожатыйҙарға ҡунаҡҡа “Рәсәй студент отрядтары” ойошмаһының Башҡортостан төбәк бүлексәһе етәксеһе Юлиә Назарова ла килде.
Йәй иһә студенттар, хеҙмәт объекттарына йүнәлтмә алып, төрлө ерҙә эшләй: балалар шифаханаларында, лагерҙарҙа, поездарҙа, мәктәптәрҙә үҙ көсөн һынай, йәйге сараларҙа ла ҡатнаша.
Көҙ “Торатау” конгресс-холында студент отрядтарының VIII слеты булды. Йәштәр унда бик күп файҙалы мәғлүмәт алды, ижади фестивалдәрҙе ҡараны һәм отряд йырҙарын башҡарҙы.
Ноябрҙә Кемерово ҡалаһында 2022 йылғы Бөтә Рәсәй студент отрядтары слеты уҙҙы. Унда Рәсәйҙең 76 төбәгенән һәм Беларусь Республикаһынан 1500-ҙән ашыу кеше ҡатнашты. Беҙҙең команда ла ситтә ҡалманы. Өс көн рәттән студенттар төрлө майҙансыҡтарҙа, сараларҙа, оҫталыҡ дәрестәрендә ҡатнашты. Йәштәр бер-береһе менән танышты, тәжрибә уртаҡлашты, шулай уҡ 2022 йылға йомғаҡ яһаны. Студент отрядтарында әүҙем тормош позицияһы булғандар ғына түгел, көн һайын ярҙамға килергә әҙер торған йәштәр ҙә тупланған.
Артем БАЙМӨХӘМӘТОВ: “Аҡбуҙат” ҡар десанты отряды етәксеһе:
– Ҡалала төрлө саралар үткәрәбеҙ, мәҫәлән, “ҡар фитнесы” йыш ойошторола. Мөмкинлек булһа, республика райондарына сығабыҙ, оҫталыҡ дәрестәре үткәрәбеҙ, ихаталарҙы ҡарҙан таҙартабыҙ, кешеләргә ярҙам итәбеҙ.
Мин, “Беренсе орден” педагог отряды ағзаһы булараҡ, йәй лагерҙарҙа вожатый булып эшләйем, балаларға күңелемдең бер өлөшөн бирәм, унда саралар үткәреп кенә ҡалмайбыҙ, тәрбиә эше аша аралашабыҙ, берҙәмлек, спорт һәм ижади һәләттәрҙе үҫтерергә тырышабыҙ.
Валерия КУЧИНА,
Өфө фән һәм технологиялар университетының Стәрлетамаҡ филиалы штабы командиры:
– Студенттар отрядына һәр кем яҙыла ала. Әгәр шат күңелле, ышаныслы һәм яуаплы икәнһең, беҙ һине көтәбеҙ. Университетта беҙҙе өҫкө кейем буйынса еңел генә танырға мөмкин.
Беләһегеҙме, мине штаб комиссары вазифаһына тәҡдим иткәстәр, бер аҙ ҡурҡа төштөм: берәй нәмәне дөрөҫ эшләмәһәм? Был бурысты үтәй алырмынмы? Әммә үҙемдә ҡурҡыу тойғоһон еңә алдым! Шулай итеп, уңайлылыҡ зонаһынан сыҡтым һәм быға үкенмәнем.
Төп эшмәкәрлектән тыш, штаб менән бергә төрлө слеттарға, форумдарға һәм интерактив сараларға йөрөйбөҙ. Ғөмүмән, беҙ һәр ваҡыт хәрәкәттә.
Шулай итеп, студенттар бер йыл эсендә төрлө ҡалаларға барып ҡайтты, кешеләргә ярҙам итте, матур уҡыу тураһында ла онотманылар. Уларҙың төп девизы – хеҙмәт, ярҙам, үҫеш.
- Ләйлә АБДУЛОВА