Журналистар оҫталыҡтарын камиллаштыра

Бөгөн Шайморат ауылында БР Үҙәк район-ара ижади берекмәһе журналистарының "Хәҙерге заман журналистикаһы аспекттары" семинары үтә.

Сараға Бөрө, Благовещен ҡалалары, Архангел, Ауырғазы, Иглин, Ҡырмыҫҡалы, Нуриман, Өфө, Шишмә райондары журналистары йыйылды.

Тәүҙә Миңлеғәле Шайморатов исемендәге күргәҙмә залы буйлап ҡунаҡтарға экскурсия ойошторолдо һәм халыҡ геройының юлы хаҡында һөйләнеләр. Мәҙәниәт йорто фойеһында Кәбәк ауылы мәктәбенең М.М.Шайморатов исемендәге “Йондоҙ” хәрби-патриотик клубы ағзалары күргәҙмә ойошторҙо. Ә клуб етәксеһе Зәки Бикбаев уҡыусыларҙың "Хәтер вахтаһы"на нисек йөрөүҙәре хаҡында һөйләне.

Ижади осрашыуҙа ҡатнашыусыларҙы Матбуғат һәм киң мәғлүмәт саралары агентлығы етәксеһе урынбаҫары Зөһрә Сәйетҡолова сәләмләне.

–  Пандемияға бәйле оҙайлы тәнәфес булды. Рәсәй Геройы Миңлеғәле Шайморатовтың тыуған төйәгендә тәүге тапҡыр осрашыуыбыҙ символик мәғәнәгә эйә, – тине Зөһрә Фәрғәт ҡыҙы.

“Башҡортостан Республикаһы” нәшриәт йорто дәүләт унитар предприятиеһының генераль директоры вазифаһын башҡарыусы Рәсүл Сәфәрғәлиев предприятиеның көнүҙәк мәсьәләләре тураһында һөйләне.

– Үкенесле, күпмелер ваҡыт беҙ йәнле аралашманыҡ. Бындай уҡытыу семинарҙары йыл дауамында барлыҡ район-ара ижади берләшмәләр өсөн үткәреләсәк, – тине Рәсүл Рәүеф улы.

Журналистар өсөн "Аҙналыҡтың заманса ҡиәфәте", "Район һәм ҡала гәзитендә контенттан аҡса яһау", "Милли телдәрҙә баҫмалар сығарыу. Үҙенсәлеге. Көнүҙәклеге. Мөһимлеге" һәм башҡа темалар буйынса оҫталыҡ дәрестәре үткәрәсәктәр.

Сығанаҡ һәм фото: karmaskaly-nov.ru