Газ бүлеүҙе туҡтатыу осраҡтары ла булған

Башҡортостан юлдаш телевидение телеканалында үткән тематик брифингта республиканың торлаҡ-коммуналь хужалыҡ министры вазифаһын башҡарыусы Ирина Голованова белдереүенсә, әле төбәктә 87 күп фатирлы йортҡа газ бирелмәй, шуларҙың 15-енә “зәңгәр яғыулыҡ” бүлеү тулыһынса, 72-һенә өлөшләтә туҡтатылған. Газ тәьминәте тулыһынса өҙөлгән йорттарҙың күпселеге (12) Өфөлә урынлашҡан.

Бындай күңелһеҙ хәлдәргә төтөн һәм елләтеү юлдарындағы етешһеҙлектәр сәбәпсе булған. Газ тәьминәтен яйға һалыу өсөн торлаҡ хужалары һәм идарасы компаниялар уларҙы үҙҙәренең иҫәбенә тулыһынса төҙәтергә тейеш.

Ирина Голованова шулай уҡ 2022 йылда “зәңгәр яғыулыҡ” бүлеүҙе туҡтатыу осраҡтары булған 26 муниципаль берәмектә мәсьәләнең хәл ителеүе, газ тәьминәтенең тергеҙелеүе тураһында хәбәр итте. Мәҫәлән, Бөрө районында 112 күп фатирлы йортҡа  газ бүлеү элегерәк туҡтатылған булһа, кисекмәҫтән ремонт эштәре башҡарылған һәм был йорттар селтәргә яңынан тоташтырылған. Баймаҡ районындағы 63, Ейәнсура районындағы 26, Күмертау ҡалаһындағы 21 йортта, шулай уҡ йәнә 22 муниципалитетта етешһеҙлектәр тулыһынса төҙәтелгән.

Фото: bashinform.ru