Бала саҡ тәме

Оло тормош юлына аяҡ баҫып, сәстәргә сал төшһә лә, бала саҡ хәтирәләренә ныҡ бәйлебеҙ. Ә бала саҡта иң тәмлеһе – өләсәй бешергән икмәк. Әлшәй райо­нынан шәхси эшҡыуар Марсель Самат улы Шәймөхәмәтов 2016 йылда икмәк бешереүгә тотонғас, өләсәһе бешергән икмәктең рецепт өлгөһөн тергеҙеп, ҡомалаҡ икмәге һәм сөсө икмәк бешерә башлай. Әле лә тап ошо икмәктәр магазин кәштәләренән иң беренсе булып һатып алынып бөтә.

– Егерме йылға яҡын район ҡулланыусылар йәмғиәтендә эшләнем. Хеҙмәт юлымды водитель булып башланым, унан гараж етәксеһе булдым. Район­дың аҙыҡ-түлек етештереүсе предприятиелары ябыла башлағас, икмәк бешереү комбинатын ҡуртымға алдым. Етештереүҙе генә түгел, хеҙмәт коллективын да һаҡлап ҡалыуға өлгәштем, – ти Марсель Самат улы.

Бөгөн комбинатта 25 кеше эшләй: икмәк бешереүселәр, кондитерҙар, водителдәр. Һәр иртә 60 – 75 ауылға хуш еҫле ҡомалаҡ икмәге, төрлө печенье юллана. Алты машина төшкә тиклем икмәкте ауылдарға алып барып ҡуя.

– Башлағанда ассортимент әллә ни ҙур түгел ине. 15 – 20 төр аҙыҡ етештергәнбеҙҙер. Әле 30 төр продукция бар. Ик­мәктең генә тиҫтәләгән төрөн бешерәбеҙ. Ауыл халҡы шылтыратып тәҡдимдәрен әйтә. Бын­дай осраҡта тағы дәртлә­не­берәк эшләйбеҙ. Мәҫәлән, тел­гә алып киткән ҡомалаҡ икмә­ге. Уның рецепт серен оҙаҡ эҙләнек. Ҡомалаҡты ситтән һа­тып алып ҡараныҡ, әммә тә­ме бөтөнләй икенсе. Шуға йә­йен коллектив менән тәби­ғәт­кә сығабыҙ ҙа ҡомалаҡ йыя­быҙ. Үҙебеҙҙең ерлектә үҫкән­декенең тәме лә, еҫе лә баш­ҡа­са. Был ҡомалаҡ әсеткеһендә һалынған икмәк оҙаҡ һаҡлана, тәме китмәй. Һәр башлан­ғысыбыҙҙы хуплап торған хакимиәт башлығы Дамир Мостафинға, бизнес-шериф Светлана Труноваға рәхмәт әйткем килә. Беҙҙең уңыштың сере – бер маҡсатта янып, халыҡ өсөн эшләү, – тип һөйләй эшҡыуар.

Беҙ барғанда икмәк бешереү цехында эш ҡайнай ине. Көндөҙ бында тәмле печенье беше­рә­ләр, ә дүрттән һуң икмәк беше­реүселәр килеп етә. Ҡамыр ба­ҫалар, төнөн икмәк һалалар. Кон­дитерҙарҙың береһе Әлфиә Абдуллинаның балалар өсөн печенье бешергән мәленә тура килдек.

– Хаҡлы ялда булһам да, эш­тән туҡтамайым. Күңелемде биреп башҡарам. Кондитер изделиеларына бары тик юғары сифатлы аҙыҡ алыуыбыҙҙан бигерәк ҡәнәғәтмен. Әлеге пе­ченьеларҙы ла үҙемдең балаларыма, ейәндәремә алам. Шә­кәре лә самалап ҡына һалына, юғары сифатлы аҡ май һалына, шуға ла улар матур, тигеҙ булып бешә, – тип ихлас һөйләй Әлфиә апай.

Эшҡыуарҙың киләсәккә план­дары ҙур. Аҙыҡ-түлек ассортиментын һәм һатыу даи­рәһен киңәйтеү. Ә был маҡ­сатҡа ирешеү өсөн заман ҡуй­ған кәртәләрҙе лә еңеп сығыу мөһим. Тәү сиратта көнәр­кәш­лек. Ни генә тимә, Әлшәй райо­нында өс ойошма икмәк бе­шереү менән шөғөлләнә. Тап һинең икмәгеңде алһындар өсөн тауарҙың сифаты юғары булырға, һатып алыусыға оҡшарға тейеш. Заман елдә­ренә бирешмәй, алға ҡуйған маҡсаттарға өлгәшергә ынтыла Марсель Шаймөхәмәтов.

Лилиә НУРЕТДИНОВА