Былтыр ноябрь айында Башҡорт ҡатын-ҡыҙҙары йәмғиәте эргәһендә махсус хәрби операцияла ҡатнашҡан хәрбиҙәрҙең ҡатындары һәм әсәләре үҙҙәренең комитетын ойошторғайны. Уның етәксеһе итеп Саҡмағош районынан Резида Ильясова тәғәйенләнде. Ул район советы депутаты, йәмәғәт эшмәкәрлеге, ирекмәнлек менән әүҙем шөғөлләнә.
– Беҙҙең йәмғиәттә махсус хәрби операцияла ирҙәре йәки улдары ҡатнашҡан, һәләк булған ҡатын-ҡыҙҙар, әсәйҙәр берләшкән. Улар бер-береһенә ярҙам итә – маскировка селтәрен үрә, шәмдәр эшләй.
Махсус хәрби операцияла ҡатнашҡан яугирҙәрҙең ғаиләләренә психологик, юридик ярҙам да күрһәтәбеҙ. Һәләк булған яугирҙәрҙең әсәләре үҙҙәре ҡайғы кисергәс, башҡаларға ярҙам итергә ынтылып торалар, изге эштәре менән үҙҙәрен йыуаталар. Мәҫәлән, улар араһында шундай әсәйҙәр бар – бер улы махсус хәрби операцияла һәләк булған, ә икенсеһе әле фронтта. Ошондай әсәйҙәр алдында баш эйергә кәрәк, сөнки баланы юғалтыуҙан оло ҡайғы юҡ. Улар иң ҡәҙерле кешеһен Ватан өсөн биргән. Үҙҙәренә ауыр булһа ла, улар бөгөнгө хәлде аңлап ҡабул итә, илһөйәр рухлы булып ҡала, – ти ул.
Әйткәндәй, Резида Ильясова үҙе лә рухлы, көслө башҡорт ҡатын-ҡыҙҙарының асыҡ өлгөһө. Ун бер бала әсәһе. Өс йәшлек ейәненә һәм ике айлыҡ ейәнсәренә өләсәй. Саҡмағош районындағы Башҡорт ҡатын-ҡыҙҙары йәмғиәте етәксеһе. Ирекмәнлек, хәйриәлек менән шөғөлләнә. Әле “Берҙәм Рәсәй” партияһының Юғары партия мәктәбендә курс үтә, шулай уҡ ирекмәндәр өсөн беренсе медицина ярҙамы серҙәрен үҙләштерә. “Шәфҡәт туташы курсының һуңғы этабын үтәм. Ғәмәли өлөшө Башҡорт дәүләт медицина университетында уҙҙы”, – тип уртаҡлашты ул. Шулай уҡ Башҡорт кооперация институтында хоҡуҡ һәм социаль тәьминәтте ойоштороу һөнәренә уҡып йөрөй.
Резида Ильясова Саҡмағош районында күптәргә яҡшы таныш, уны райондаштары уңған, оҫта хужабикә, тормош иптәше Филүс Рәүил улының ныҡлы терәге, балалары өсөн йән атып торған әсәй, яҡташтарына һәр саҡ ярҙам ҡулы һуҙырға әҙер йәмәғәтсе итеп белә.
“Ниңә йәмәғәтсе булыу теләге тыуҙы? Ҙур ғаиләне бағып өлгөрөргә кәрәк бит”, – тип ҡыҙыҡһындыҡ унан.
– Минең бер улым – медицина хеҙмәткәре, икенсеһе махсус хәрби операцияла ҡатнаша. Улар: “Әсәй, беҙҙең өсөн генә йәшәмә, башҡаларға ла ярҙам ит. Һине күп балалы әсә тип кенә белмәһендәр, ә йәмғиәтебеҙгә файҙалы кеше тип тә таныһындар”, – тип кәңәш иттеләр. Шунан һуң ошондай йәмәғәт эшенә тотондом. Хәҙер был эшмәкәрлегем оло кинәнес килтерә, сөнки райондаштарым өсөн файҙалы эштәр башҡарам, уларҙың ҡайғы-шатлыҡтарын уртаҡлашам, мәсьәләләрен хәл итеү юлдарын эҙләйем. Һәр эште йән йылыһы, йөрәк наҙы менән башҡарам. Депутат эшмәкәрлеге кешеләргә ярҙам итеүҙән ғибәрәт. Халыҡ менән төрлө дәрәжәләге етәкселәр араһында бәйләнеш тыуҙырырға тырышабыҙ, – тине ул.
Оло йөрәкле ҡатын яңғыҙ һәм оло йәштәге, физик мөмкинлектәре сикләнгән кешеләргә лә ярҙам итә. “Уларҙың күптәре, матди ярҙамдан да бигерәк, иғтибарға, аралашыуға зар-интизар. Беҙ Саҡмағош районындағы Башҡорт ҡатын-ҡыҙҙары йәмғиәте ағзалары менән уларға дарыу, аҙыҡ-түлек алып килеү, документтар юллау йәһәтенән ярҙам итәбеҙ. Район башҡорт ҡоролтайының ата-әсәләр комитеты (етәксеһе – Рәмзиә Әлфәрит ҡыҙы Сәләхова) ағзалары менән берлектә Башҡортостандан махсус хәрби операцияла ҡатнашҡан яугирҙәргә гуманитар йөк йыйыуҙа ярҙам итәбеҙ”, – тип дөйөм эштәргә туҡталды ул.
Әйткәндәй, был ойошмалар йәш быуында илһөйәрлекте тәрбиәләү, үҫмерҙәрҙе хәрби хеҙмәткә әҙерләү буйынса ла әүҙем эш алып бара.
Йәмәғәт эше күп шәхси ваҡытты ала. Резида Зәкәриә ҡыҙына ла Башҡорт ҡатын-ҡыҙҙары йәмғиәте советының ойоштороу эштәрендә әүҙем ҡатнашырға һәм ошо маҡсатта йыш Өфөгә йөрөргә лә тура килә. Шуға ла: “Бындай ваҡытта нисек өлгөрәһегеҙ?” – тип ҡыҙыҡһынам. “Ҡәйнәм Глүзә Әнғәм ҡыҙы – оло терәгем. Юлға сыҡҡанда өйҙө, балаларҙы уға ышанып ҡалдырып, тыныс ҡына йөрөй алам”, – тине ул.
Эйе, теләк булғанда, изге эштәр өсөн йөрәк янып торғанда, яҡшылыҡҡа юлдар үҙе асылалыр.
Рәмилә МУСИНА