Коронавирус менән ауырығандар кәмей

Бөгөнгө Хөкүмәттең Республикаға идара итеү үҙәгендә ойошторолған аҙналыҡ кәңәшмәһен Башҡортостан Башлығы Радий Хәбиров Башҡортостан Дәүләт Йыйылышы – Ҡоролтай рәйесе Константин Толкачевты үткән тыуған көнө менән тәбрикләүҙән башланы. 1 мартта парламент етәксеһенә 70 йәш тулғайны. Радий Хәбиров уға юбилейы уңайынан ҡотлауҙарҙы, күп йылдар уңышлы эшләгәне өсөн партия рәйесе Дмитрий Медведевтан рәхмәт һүҙҙәрен еткерҙе. Юбилярға “Берҙәм Рәсәй”гә 20 йыл миҙалы тапшырылды.

Кәңәшмәлә һаулыҡ һаҡлау министры Айрат Рәхмәтуллин белдереүенсә, Башҡортостанда коронавирус менән сирләү осраҡтары кәмей башлаған.

Рәсәй Хөкүмәтенең координация үҙәге мәғлүмәттәре буйынса, һуңғы ете көндә сирләү осраҡтары һаны 1691 тәшкил иткән, был уҙған аҙна менән сағыштырғанда 19 процентҡа аҙыраҡ, тип билдәләне Айрат Рәхмәтуллин. Коронавирусты дауалау өсөн республиканың йоғошло сирҙәр госпиталдәрендә 310 урын әҙерләнгән, уларҙың 34 проценты буш.

Айрат Рәхмәтуллин әйтеүенсә, киҫкен респиратор вирус инфекцияһы менән ауырыусылар һаны ла кәмегән. 10 мең кешегә күрһәткес 76 тәшкил итә, был уҙған аҙна менән сағыштырғанда 23 процентҡа аҙыраҡ.

Рәсәй Хөкүмәтендә төбәктәрҙең һанлы трансформацияһы рейтингына йомғаҡ яһалған. Ошо күрһәткес буйынса республика Рәсәйҙә – алтынсы, Волга буйы федераль округында икенсе урынға сыҡты. Бер йылда ғына ул 32-се баҫҡысҡа күтәрелгән. Был хаҡта кәңәшмәлә Башҡортостан Башлығы Радий Хәбиров хәбәр итте.

Башҡортостан юғарыла әйтелгән йүнәлеш буйынса илдә иң юғары үҫеш темпын күрһәтте. Хәҙер республика алдында тәүге өс лидер иҫәбенә инеү бурысы тора.

Фото: "Башинформ".