Медицина ярҙамы етеҙ ҙә, ышаныслы ла булһын

Ауырыу кешегә ашығыс медицина ярҙамы талап ителгәндә һәр кем ҙур өмөт менән 03 йә иһә 103 телефон номерын йыя. Хәл иткес минуттарҙа тейешле медицина ярҙамының тиҙерәк барып етеүе һәм сифатлы ярҙам күрһәтеүе өсөн, белгестәрҙән, водителдәрҙән тыш, ашығыс ярҙам машиналарының ышаныслы һәм төҙөк булыуы шарт. Һөйөнөскә күрә, һуңғы йылдарҙа республиканың медицина учреждениелары автопаркы яңырғандан-яңыра, заманса транспорт саралары менән тулылана бара.

Башҡортостан Башлығы Хакимиәте етәксеһе Максим Забелин был юлы республиканың 37 ҡала һәм райондары дауаханаларының баш табиптарына төрлө модификациялы өр-яңы 65 санитар автомобиле асҡыстарын тапшырҙы.

– Бөгөн медицина учреждениелары тәүге медицина звеноһы өсөн  үҙҙәрен яҡшы яҡтан күрһәткән LADA Granta базаһындағы  автомобилдәрҙе генә түгел, ә ашығыс медицина ярҙамы машиналарын да ала. Шулай уҡ беҙҙең иҫкәртеү звеноһы ла ҙур автопаркка эйә буласаҡ: уны күсмә фельдшер-акушерлыҡ пункттары һәм медицина тикшеренеүҙәре өсөн комплекстар тулыландыра. Һуңғы видеоселектор кәңәшмәһендә Рәсәй һаулыҡ һаҡлау министры Михаил Мурашко пандемия менән көрәш, ғүмер оҙайлығын арттырыу буйынса лайыҡлы эш күрһәткән биш төбәк иҫәбендә беҙҙең республиканы ла атаны. Шулай уҡ беҙ табип­тарыбыҙҙың Донбасс халҡына нисек ярҙам күрһәтеүен дә яҡшы беләбеҙ. Был беҙҙең автопарктың һуңғы яңырыуы булмаясаҡ, – тип билдәләне Максим Забелин.

Республиканың медицина учреждениелары 11 күсмә фельдшер-акушерлыҡ пункты модуле алды. Малаяҙ үҙәк район дауаханаһы автопаркы механигы Виктор Шабалин үҙҙәренә бирелгән бүләккә шатланып бөтә алмай. “2015 йылдан алып механик булып эшләйем, әлегә тиклем бындай ҙа яҡшы йыһаз­ландырылған машина алғаныбыҙ булманы. Юлға сығасаҡ һәр машинаның төҙөклөгөн, сифатын контролләргә тейешбеҙ. Ә бындай уңайлы, тейешле заманса ҡорамалдары булған автомо­билдәр халыҡҡа медицина ярҙамы барып етеүен тиҙләтәсәк, ышаныслы, шәп машина!” – тигән баһа бирҙе ул.

Модуль ҡан баҫымын үлсәү өсөн аппараттар, портатив электрокардиограф, ҡандағы гемоглобин кимәлен билдәләүсе анализатор, дефибриллятор, үпкәне яһалма елләтеү системалары һәм башҡа ҡорамалдар менән йыһазландырылған. Ҡырмыҫҡалы үҙәк район дауаханаһы өсөн яңы күсмә комплекс  алырға килгән механик Азамат Әминев менән водитель Игорь Фәхретдиновтың да кәйефе күтәренке. “Бындай “тимер ат”тарҙа эшләүе күңелле буласаҡ, иң мөһиме, медицина ярҙамы пациенттар өсөн бик уңайлы”, – ти улар.

Диспансерлаштырыу үткәреүҙә медицина хеҙмәткәрҙәренә “Күсмә медицина тикшеренеүе” комплексы ҙур ярҙамсы буласаҡ. Унда GSM каналы буйынса мәғлүмәтте тапшырыу мөмкинлеге булған һанлы флюорограф һәм электрокардиограф булыуы уңайлылыҡ тыуҙыра. Ашығыс ярҙамға мохтаж  ауырыуҙарға медицина ярҙамы күрһәтеү һәм транспортта илтеү өсөн бөтә ҡорамалдар менән йыһазлан­дырылған ышаныслы һәм ябай 14 ашығыс ярҙам автомобиле лә республика поликлиникаларына һәм дауаханаларына юл тотто. Башҡортостандың медицина автопаркын шулай уҡ яҡшы йыһазландырылған LADA Granta база­һындағы 40 автомобиль тулыландырҙы. Һаулыҡ һаҡлау министры Айрат Рәхмәтуллин билдәләүенсә, Рәсәйҙә етештерелгән 65 машина федераль һәм республика аҡсаларына алынған. Улар ҡатмарлы тәбиғәт һәм юл шарттарында йөрөү өсөн ҡулайлаштырылған. “Беҙ медицина учреждениеларын “Һаулыҡ һаҡлау” милли проектына ярашлы яңы автомобилдәр менән тулыландырабыҙ. Был эштәрҙең барыһы ла халыҡҡа медицина ярҙамын яҡынайтыу, сифатын яҡшыртыу һәм уңайлыраҡ итеү өсөн башҡарыла”, – тине һаулыҡ һаҡлау министры.

Динә АРЫҪЛАНОВА