Яҙғы мәшәҡәттәр фермерҙы ҡурҡытмай

Бынан туғыҙ йыл элек крәҫтиән (фермер) хужалығы төҙөп, үҙ эшен асҡан Ләйсән Хәмитйәнова – хәҙер инде аяғында ныҡлы баҫып торған фермер. Әле хужалыҡта 60 баш мал аҫрала. Ит етештереү тармағы буйынса эш уңышлы дауам итә, һөтсөлөккә лә иғтибар ҙур. “Симменталь” тоҡомло 28 һауын һыйырын машина менән һауыуҙы оператор Флүзә Бәҙретдинова башҡара. Тәүлегенә 220 литр самаһы һөт һауылып, район магазиндарына һатыуға сығарыла.

– Һыйырҙар быҙаулап бөттө, һөт арта башланы. Шуға күрә һөт аҙыҡ-түлеге етештереү ҙә арта, эремсек, ҡаймаҡ, ҡатыҡ кеүек аҙыҡтар магазинға сығары­лыу менән һатылып бөтә, – ти Ләйсән.

Ҡузбай ауылы фермеры етеш­тергән һөт ризыҡтарын ра­йондың һәр магазинында тиерлек осратырға мөмкин. Сифатлы продукцияны халыҡ яратып, көтөп ала. “Хәмитйәнова” крәҫ­тиән (фермер) хужалығы күптән сә­сеүгә сығырға әҙер, агрегаттар, техника көйләнгән. Орлоҡ та етер­лек. Яҙғы мәшәҡәттәр фер­мерҙы ҡурҡытмай. Ләйсәндең тормош иптәше, механизатор Илһам Хәмитйәнов – хужа­лыҡ­тың төп ярҙамсыһы, фермерҙың “уң ҡулы”. Ә башҡараһы эштәр, тор­мошҡа ашыраһы уй-хыялдар ҡолас еткеһеҙ. “Бына был гараж­ды төҙөп бөтөрһәк, мал аҙбарын киңәйтә алһаҡ, эшемдән тағы ла ҙурыраҡ ҡәнәғәтлек кисерер инем”, – тип пландары менән уртаҡлаша фермер. Уңған­дарға уңыш юлдаш буласағына шиклән­мәйбеҙ.

- Гөлназ ХУЖИНА
Борай районы