Өфө хосписына хәйриә өмәләренә саҡыралар

"Башинформ" мәғлүмәт агентлығы хәбәр итеүенсә, Башҡортостанда дауалап булмаҫлыҡ сирле балалар һәм өлкәндәр өсөн Өфө хосписындағы хәйриә өмәләрендә ҡатнашырға мөмкин. Саралар быйыл йәй Даян Мурзин урамы, 8 адресы буйынса асыласаҡ учреждение биләмәһендә үтә.

Бөгөн һәм иртәгә учреждениела йыһаз йыйыуҙа ярҙам кәрәк, ә алдағы ял көндәрендә, 8 һәм 9 апрелдә, бында палаталарҙы һәм биналарҙы генераль йыйыштырыу, шулай уҡ тәҙрәләрҙе йыуыу ойоштороласаҡ. Профессиональ клининг компаниялары яғынан да ярҙам тәҡдим итеү хуплана.

Көндәрҙең береһенә гугл-форма аша һылтанма буйынса яҙылырға, исем-шәрифеңде, бәйләнеш координаттарыңды һәм уңайлы ваҡытты атарға ғына кәрәк.

Бөтә һорауҙар буйынса хоспистан ойоштороусылар Оксана Пономареваға (8-927-346-64-79) һәм Анастасия Васютинаға (8-927-316-30-88) мөрәжәғәт итергә була.

Өфө хосписы тәүге пациенттарҙы Башҡортостан Башлығы Радий Хәбировтың ҡарары менән 2023 йылдың июнь аҙағында ҡабул итә. Учреждениены бюджеттан тыш сығанаҡтар иҫәбенә төҙөйҙәр.

Фото: ufahospice.ru