Һабантуй майҙаны заманса була

Ауырғазы районында оҙаҡламай һабантуйҙар үткәреү өсөн махсус биләмә барлыҡҡа киләсәк. Был хаҡта республиканың Торлаҡ-коммуналь хужалыҡ министрлығы хәбәр итә. Әлеге мәлдә подрядсы билдәле булған да инде.

Төҙөлөш (төҙөкләндереү) эштә­ре апрель айында уҡ башлана, әммә быйылғы һабантуйға билә­мәне өлгөртә алмайҙар – эштәрҙе йәй аҙағына тамамларға йыйыналар. Әйткәндәй, эштәрҙең беренсе этабы былтыр уҡ булғайны – ул саҡта яҡтылыҡ үткәрелде, ҡойма­лар, төп инеү урынында ҡапҡа ҡуйылды һәм йүгереү юлына асфальт түшәлде. Бынан тыш, бер нисә спорт майҙансығы ла бар­лыҡҡа килде: мини-футбол, волейбол, воркаут һәм трибуналы көрәш майҙансығы. Волейболға ныҡла­быраҡ туҡталғанда, бында майҙан­сыҡ­ҡа ҡом түшәлде, ҡалған май­ҙансыҡтарҙа – махсус резина япма.

Эшләнгән эштәр араһында йә­йәүлеләр өсөн юл төҙөкләнде­релде, эскәмйәләр ҡуйылды, сүп ташлау өсөн һауыттар беркетелде. Подрядсы яҡтылыҡ менән тәьмин итеүгә айырыуса иғтибар иткән: биләмәне ҙур махсус 40 лампа яҡтыртасаҡ.

Быйыл башҡарыласаҡ эштәргә килгәндә, проект буйынса биләмәлә сәхнә, тамашасы трибунаһы, эскәм­йәләр, кесе архитектур формалар һәм видеокүҙәтеү урынлашты­рыласаҡ.

Һабантуй биләмәһе “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль программаһы сиктәрен­дә төҙөкләндерелә. Проекттың маҡсаты – төбәктә үҙенсәлекле һәм зауыҡлы биләмәләр булдырыу. Министрлыҡта билдәләүҙәренсә, был үҙ сиратында халыҡтың мәҙәни һәм социаль үҫеш кимәлен дә яҡшыртасаҡ.

Рәмил МАНСУРОВ