Сыуаш милли-мәҙәни үҙәге булдырыласаҡ

Бөгөн Талбазыла Башҡортостан Башлығы Радий Хәбиров Үҙәк район китапханаһында булып, учреждениеның эше менән танышты.

Майҙан бында балалар бүлексәһендә һаулыҡ мөмкинлектәре сикле балалар өсөн "Доктор Китап" библиотерапия үҙәге эшләй. Был проект "Бәләкәй ҡалаларҙың һәм ауылдарҙың мәҙәни мозаикаһы" III Бөтә Рәсәй конкурсында еңеүсе булған һәм 500 мең һум күләмендә грант алған.

Ауырғазы үҙәкләштерелгән китапхана системаһы директоры Айгөл Ғәзиева бүленгән аҡсаға оҫталыҡ дәрестәре үткәреү өсөн ҡорамалдар һатып алыуҙары хаҡында һөйләне. Проект шулай уҡ Граждандар йәмғиәтенә булышлыҡ итеү фондының Президент гранттарына беренсе конкурсында еңеүсе булған һәм тағы ла 500 мең һум алған. Уларҙа интерактив ҡомлоҡ, ҙур ҡурсаҡтар тегелгән, Корней Чуковскийҙың әкиәттәренән сюжеттар менән уйын зонаһы биҙәлгән. Башҡа проекттарҙа отоп алынған гранттарға китапхана интерактив панель һатып алған һәм мордва мәҙәниәтенең "Лисьмаприне" этностудияһын асҡан.

Радий Хәбиров дәрестәрҙең нисек үтеүен ҡараны, балаларҙың ата-әсәләре менән аралашты. Ул уҡыусылар шөғөлләнгән китапхана биналарын ремонтлау буйынса тейешле йөкләмәләр бирәсәген билдәләне.

Ошонда уҡ төбәк етәксеһе райондың почетлы гражданы, республиканың атҡаҙанған төҙөүсеһе, элек Сыуашстандың Башҡортостандағы тулы хоҡуҡлы вәкиле булып эшләгән Георгий Орлов менән осрашты. Ветеран төбәк Башлығына Башҡортостанда милли мәҙәниәттәрҙе, туған телдәрҙе үҫтереүгә шәхси иғтибары өсөн рәхмәт белдерҙе.

- Шуныһы мөһим: беҙҙең телдәрҙе, ғөрөф-ғәҙәттәрҙе һәм традицияларҙы һеҙҙең ярҙам менән балалар мәктәптәрҙә өйрәнә. Республика ҡалаларында, райондарында полилингваль гимназиялар асыу - күп милләтле Башҡортостаныбыҙ ғорурлана алырлыҡ күренеш, - тине Георгий Орлов.

Радий Хәбиров Талбазы халҡының сыуаш милли-мәҙәни үҙәген булдырыу тәҡдимен хупланы.

- Мишкә ауылында бына тигән мари милли-мәҙәни үҙәге эшләп килә, Тәтешлелә удмурт үҙәген реконструкциялауҙы башланыҡ. Ауырғазы районы хакимиәте башлығына Талбазы үҙәгендә сыуаш үҙәген урынлаштырырлыҡ бина һайларға йөкләмә бирәм. Унда мотлаҡ музей, концерттар уҙғарыу залы булырға тейеш. Көҙ шулай уҡ Талбазыла сыуаш үҙәктәре һәм йәмәғәтселек әүҙемселәре ҡатнашлығында кәңәшмә үткәрергә тәҡдим итәм, - тине Башҡортостан Башлығы.

Фото: glavarb.ru