Радий Хәбиров ҡатын-ҡыҙҙарҙың һорауҙарына яуап бирҙе

"Ҡатын-ҡыҙ бәхете биләмәһе" форумының түңәрәк өҫтәлендә сығыш яһап, ҡатнашыусыларҙың һорауҙарына Башҡортостан Башлығы Радий Хәбиров яуап бирҙе. Атап әйткәндә, ул республиканың Дәүләт Йыйылышы — Ҡоролтайға көҙгө һайлауҙарҙан һуң ҡатын-ҡыҙ депутаттар һаны артыу ихтималлығы тураһында үҙ фекере менән уртаҡлашты.

«Дәүләт органдарында, парламентта ҡатын-ҡыҙҙарҙың булыуына — фатиха. Мин һәр ваҡыт ҡатын-ҡыҙ тәбиғәте буйынса яуаплыраҡ, бәлә-ҡазаларға сыҙамлыраҡ тип билдәләйем. Ә һайлауҙар тураһында һүҙ барғанда мин бер ҡасан да ҡатын-ҡыҙҙарға һәм йәштәргә билдәле бер квота бирергә кәрәк тигән позицияға ҡуйманым. Шулай ҙа беҙ ҡатын-ҡыҙҙың үҙе теләгәненән һәм бының өсөн һөнәри сифаттарына эйә булыуынан сығып һүҙ йөрөтөргә тейешбеҙ. Һайланыу бер, эшләү икенсе нәмә. Парламентта, беренсенән, кешеләр эшләргә тейеш. Халҡыбыҙ һайлау ваҡытында ошо сифаттарға таяныр тип уйлайым", — тине Радий Хәбиров.

Башҡортостан Республикаһының ике районы етәкселәре бөгөн ҡатын-ҡыҙ һәм республика улар менән ғорурлана ала, тип хәтергә төшөрҙө төбәк башлығы.

Ҡатнашыусыларҙың береһе республика Башлығынан күләмле форумдарҙың файҙаһы һәм уларҙың Башҡортостандың үҫешенә йоғонтоһо тураһында һораны.

- Әлбиттә, беҙҙең аныҡ маҡсатыбыҙ бар, саралар төбәкте танытыу өсөн эшләнә. Мин һәр ваҡыт Башҡортостандың һәм уның потенциалының: традицион тыйнаҡлығыбыҙ арҡаһында кеше, мәҙәни, сәйәси, тәбиғи һәм иҡтисади яҡтан баһалап бөткөһөҙ булыуынан сығып эш иттем. Әммә быны эшләргә кәрәк, сөнки был ресурстар өсөн көрәштең бер өлөшө. Ресурстар бөтөнләй башҡаса булыуы мөмкин, беҙ хәҙер хеҙмәт ресурстарына ҡытлыҡ менән осрашабыҙ һәм, Башҡортостан тураһында һөйләгәндә, төбәккә яңы хеҙмәт йәлеп итәбеҙ. Әгәр республиканың үҫеш темптары хәҙерге кеүек икән, тимәк, беҙҙең предприятиеларҙа эшләү өсөн башҡа төбәктәрҙән һәм илдәрҙән кешеләрҙе йәлеп итергә тура килеүе ихтимал. Иң мөһиме республикабыҙҙы асыҡтан-асыҡ иғлан итеү, тип һыҙыҡ өҫтөнә алам. Беҙҙә ғорурланырлыҡ нәмә бар! — тине Радий Хәбиров.

Форумда ҡатнашыусылар иң актуаль теманы — СВО темаһын һәм хәрбиҙәргә ярҙамды иғтибарҙан ситтә ҡалдыра алманы. Был һорауға яуап биреп, Башҡортостан Башлығы билдәләүенсә, махсус операция ҡатмарлы тарих булып тора, әммә уның башҡа яғы бар, уға барыһы ла иғтибар итмәй:

“Беҙгә барыбыҙға ла билдәле бер тетрәнеү кәрәк ине. СВО менән булған хәл барыбыҙҙы ла үҙебеҙгә, илебеҙгә ситтән ҡарарға, бер-беребеҙгә ҡарарға мәжбүр итте. Ул барыбыҙҙы ла бергә йыйҙы. СВО-лағы егеттәребеҙ, милләтенә ҡарамай, бөтәһе лә үҙҙәрен башҡорт тип атай, тип бер нисә тапҡыр әйттем инде”, - тине Радий Хәбиров һәм хәрбиҙәргә ярҙам иткән барлыҡ ҡатын-ҡыҙҙарға рәхмәт һүҙҙәрен еткерҙе.

Билдәле федераль спикерҙар ҡатнашлығында оҫталыҡ дәрестәренә һәм лекцияларға килгәндә, Радий Хәбиров тәү сиратта республикабыҙҙың барлыҡ ҡунаҡтарына һәм бөгөнгө форумға рәхмәт әйтергә теләүен билдәләне.

Һөйләшеү аҙағында Радий Хәбиров отпуск буйынса кәңәштәр бирҙе.

"Рәсәй ҙур, беҙ быны беләбеҙ. Илебеҙ менән яҡшыраҡ танышыу өсөн ҙур мөмкинлек бар, тине ул. Әлбиттә, беҙҙә шифаханалар селтәре бар, әммә беҙ тағы ла алға киттек һәм хәҙер туристик инфраструктураны үҫтерәбеҙ, иҫтәлекле урындарыбыҙҙы яҡшырта башланыҡ. Традицион походтарҙан, рафтингтан тыш, Башҡортостан ҡыҫҡа сәфәрҙәр өсөн дә мауыҡтырғыс булып килә. Өфөнән бер сәғәт алыҫлыҡта ғына Торатау, Воскресенский ҡорамы йәки Красный Ключҡа барып етергә мөмкин», — тине ул Башҡортостанда ял итеүҙең өҫтөнлөктәре тураһында. Ул шулай уҡ республиканың барлыҡ халҡын һәм ҡунаҡтарын Башҡортостан тураһында  социаль селтәрҙәрҙә күберәк һөйләргә саҡырҙы.

Фото һәм мәғлүмәт сығанағы "Башинформ" мәғлүмәт агентлығы.