Дауаһы ла, һауаһы ла килешә

Ғафури районының тауҙар ҡуйынына һыйынып ҡына ултырған “Красноусол” шифаханаһына яңы һулыш инә. Корпустарҙы реконструкциялау, яңы медицина ҡорамалдары алыу, белгестәрҙе эшкә йәлеп итеү буйынса ҙур эш башҡарыла.“Красноусол” шифаханаһы яуаплылығы сикләнгән йәмғиәте директоры, медицина фәндәре докторы, халыҡ-ара экология, хәүефһеҙлек фәндәре академияһы академигы, Башҡортостандың атҡаҙанған табибы, Рәсәйҙең атҡаҙанған һаулыҡ һаҡлау хеҙмәткәре, Башҡортостандың атҡаҙанған төҙөүсеһе Рәмил Рафаил улы БӘҘРЕТДИНОВ менән әңгәмәбеҙ һаулыҡ йортонда һуңғы осорҙа башҡарылған эштәргә, үҙгәрештәргә ҡағылды.

– Рәмил Рафаил улы, һеҙҙең шифахана нимәһе менән үҙен­сә­лекле? Һүҙҙе ошонан баш­лайыҡ.

– “Красноусол” курорты – рес­публикабыҙҙың 99 йыллыҡ тарихы булған боронғо һаулыҡ йорто. Ул һыу сығанаҡтарына, шифалы батҡаҡтарға, үҙенсәлекле үҫемлек донъяһына бай таулы-урманлы хозур ерҙә урынлашҡан.

Шифахана эшмәкәрлегенең төп йүнәлеше – аҙыҡ эшкәртеү органдары, һөйәк -мускулдар, матдәләр алмашыныуы, нервы, тын юлы системалары, гинекология, урология, тире сирҙәрен дауалау.

Курорттың төп байлығы – бай тәбиғи дауалау факторҙары: уртаса климат, дүрт төр минераль һыу.

– “Красноусол” шифахана­һы­на етәксе булып тәғәйенлә­не­үе­геҙгә бер йыл үтте. Шифахананы киңәйтеү буйынса ниндәй пландар бар?

– Перспективалар тураһында әйткәндә, “Красноусол” шифахана­һын үҫтереүҙең комплекслы про­граммаһы эшләнде. Киләһе йылда шифаханаға 100 йыл тулыуы ла –  мө­һим ваҡиға. Курорттың тәбиғи дауалау потенциалын иҫәпкә алып, койка фондын 650-700-гә тиклем арттырыу планы бар. Был иһә эш урындарын да күбәйтәсәк. Үҙебеҙ­ҙең һәм шифахана-курорт тарма­ғы­ ғалимдарының фән­ни эштәрен ҡулланып, медицина технологиялары спектрын киңәй­тәбеҙ һәм практикаға дауалауҙың заманса ысулдарын индерәбеҙ.

– Уҙған йыл һеҙҙең өсөн нисек булды?

– Йыл ябай булманы. Ҡышты ауырлыҡ менән сыҡтыҡ. Йылытыу, һыу менән тәьмин итеү, канализация системаһында авариялар булды. Шуға тәү сиратта инженер сел­тәр­ҙәрен капиталь ремонтлауға тотондоҡ.

– Әлеге мәлдә биләмәлә ҙур төҙөлөш эштәре ҡуҙғатылған. Ниндәй үҙгәрештәр бар?

– Бөгөнгө көндә 5-се корпусты ремонтлау бара, уның ҡыйығы ла, инженер коммуникациялары ла алмаштырыла. Шулай уҡ ашхананың түбәһе яңыртыла, һыу бюветында йылытыу системаһы ҡабат­тан эшләнә, уның фойеһында дарыухана һәм сувенирҙар өсөн сауҙа киоскын урынлаштырҙыҡ. Яңы һаҡлаулы автотуҡталыш төҙөү тулы көскә бара, һөҙөмтәлә уның майҙаны 2,5 тапҡырға артасаҡ. Барлыҡ эштәр ял итеүселәрҙең уңайлылығын хәстәрләүгә йүнәл­телгән. Ошо маҡсатта 5-се һәм 6-сы корпустар араһында кафе-ашхана төҙөй башланыҡ. Шифаха­наның барлыҡ биләмәһе буйынса – йылылыҡ, эҫе һәм һалҡын һыу менән тәьмин итеү системаһы, урам яҡтыртҡыстар яңыртыла, энергияны һаҡлаусы лампалар ҡуйыла. Йылылыҡ системаһы, иҙәндәр алмаштырылғандан һуң 3-сө корпуста яңыртылған спорт залы асылды. Был да ял итеүселәр өсөн һөйөнөслө ваҡиға булды. Шулай уҡ биләмәләге эшлектән сыҡҡан юлдарҙы алып ташланыҡ. Әле йәшелләндереү һәм ландшафт эштәре алып барабыҙ.

– Регистратура тирәһендә лә ремонт башланған...

– Үткән йылда уҡ регистратура корпусы ремонтланғандан һуң, шифахананың барлыҡ идаралыҡ аппараты ошо корпусҡа күсерелде. Был иһә персонал эшен тиҙ алып барыуға булышлыҡ итә. Яңы кафетерий асылды, был да беҙҙең ял итеүселәребеҙ өсөн бик уңайлы. Әле йәшелләндереү, төҙөклән­дереү саралары күрелә. Быйыл яҙын Хәтер баҡсаһына 130 төп ағас ултырттыҡ. Шулай уҡ шифа­хананың үҙәк майҙанында төҙөк­лән­дереү эштәре дауам итә.

– Дауалау-диагностика комплексы бинаһына өсөнсө ҡатты төҙөү ниндәй маҡсатта эшләнде?

– Майҙаны 2500 квадрат метрға тиң өс ҡатлы дауалау-диагностика комплексының эсендә реконструкция эштәре тулы көскә бара. Май­ҙаны ғына артып ҡалманы, яңы эш урындары ла барлыҡҡа килде. Бында профилле йүнәлешле белгес­тәрҙең кабинеттары, диагностика хеҙмәттәре урынлашасаҡ, шулай уҡ яңы төр медицина хеҙмәттәре, шул иҫәптән түләү­леләре лә, барлыҡҡа киләсәк. Ә өсөнсө ҡатта заманса СПА-үҙәк эшләйәсәк.

– Етәксе өсөн коллективтың берҙәмлеге бик мөһим. Эшегеҙҙе нисек баһалай­һығыҙ?

– Ябай булмаған осорҙа хеҙмәт хаҡын күтәреү, эш шарттарын яҡ­шыртыу арҡаһында берҙәм, төплө коллектив булдыра алдыҡ, тип уйлайым. Әлбиттә, кадрҙарҙың алмашыуы була торған күренеш. Беҙ­ҙә һөнәри оҫталыҡ, эшкә намыҫлы ҡараш, бер-береңә ярҙам итеү кеүек сифаттар юғары баһа­лана. Бының өсөн коллективҡа рәхмәт­лемен. Был ваҡыт эсендә 200-ҙән ашыу юғары квалификациялы белгесте эшкә ҡабул иттек. Улар ара­һында етәкселәр ҙә, шәфҡәт туташтары ла, хеҙмәт­ләндереүсе персонал да бар.

Бөгөн шифаханала 567 хеҙмәт­кәр эшләй. Уларҙың 20-һе – табип, 74-е – шәфҡәт туташы. Араларында Рәсәйҙең һәм Башҡортостандың һаулыҡ һаҡлау отличниктары, атҡа­ҙанған табиптар бар, 62 процент хеҙмәткәр юғары категорияға эйә. Ял итеүселәр туғыҙ табип-физио­терапевтың хеҙмәтенән файҙалана ала, шулай уҡ невролог, гинеколог, уролог, нефролог, диетолог, эндокринолог, стоматолог, дерматовенеролог, озонотерапевт,  гирудотерапевт, педиатр, психологтан кон­сультация алыу мөмкинлеге бар.

– Һеҙ етәкселек итә башлағас ниндәй йүнәлештә эш йәнләнде?

– Йыл дауамына күп ойоштороу һорауҙарын хәл итеүгә өлгәштек. Персоналдың эшен яҡшыртыу, ял итеүселәргә хеҙмәт төрҙәрен ки­ңәй­теү өсөн яңы бүлектәр булдыр­ҙыҡ. Улар – дауалау-диагностика, спорт-һауыҡтырыу, туҡланыу комплекстары, хәүефһеҙлек хеҙмәте, тәьмин итеү һәм сауҙа бүлеге. Был осорҙа шифахана-курорт дауала­ны­уының профиль программалары эшләнде, байтаҡ өҫтәмә дауалау-һауыҡтырыу саралары булдырылды.

Бөгөн “Красноусол”да ошондай диагностика тикшереүҙәре уҙға­рыла: ЭКГ, функциональ, ультратауыш диагностикаһы, клиника-диагностика тикшереүе, фиброгастродуоденоскопия, урофлометрия, денситометрия һәм башҡалар.

Быйыл беҙҙең тарафтан өҫтәмә рәүештә 22 төр медицина хеҙмәт­тәре индерелде, улар барыһы ла заманса медицина ҡорамал­дарында башҡарыла. Әлеге көндә медицина хеҙмәттәрен күрһәтеүҙә шифахананың матди-техник база­һын яңыртыу һәм киңәйтеү маҡсатында 37 берәмек медицина ҡорамалы алынды, шул иҫәптән ҡоро углекислоталы ванналар, магнит терапияһы, яҡтылыҡ, электр менән дауалау өсөн физиотерапия ҡорамалдары һәм башҡалар.

– Ял итеүселәрҙең туҡланы­уына ниндәй иғтибар бирелә?

– “Красноусол” шифаханаһында туҡланыуға иғтибар ҙур. Сөнки ул дауалауҙа, ауырыуҙарҙы профи­лак­тикалауҙа, һаулыҡты нығытыуҙа мөһим роль уйнай. Ял итеүселәргә швед, заказлы һәм диетик өҫтәлдәр тибындағы ашатыу тәҡдим итәбеҙ. Беҙҙәге туҡланыу төрлөлөгө менән айырыла, урындағы етештереүсе­ләр­ҙең тәбиғи, экологик яҡтан таҙа продукттары, аҙыҡты эшкәрткәндә заманса технологиялар ҡулланыла. Менюға көн һайын сифатлы ит, ба­лыҡ, һөт ризыҡтары, башҡорт ба­лы, йәшелсә, еләк-емеш индерелә.

– Ял итеүселәр ниндәй шарттарҙа йәшәй?

 – Шифаханала ял итеүселәргә  төҙөкләндерелгән 10 корпус тәҡдим итәбеҙ, уларҙың һәр береһе үҙенсә­лекле архитектура һәм дизайн менән айырылып тора. Холл һәм ҡышҡы баҡсалар ҙа зауыҡ менән эшләнгән.

Йәшәү өсөн уңайлылыҡ кимәле төрлөлөгө ял итеүселәргә һайлау мөмкинлеге бирә: стандарт, ярымлюкс һәм люкс категориялы номерҙар, айырым коттедж бар.

– Әүҙем ял итеү өсөн ниндәй мөмкинлектәр ҡаралған?

– Ял менән тәьмин итеү өсөн беҙҙә яҡшы база булдырылған һәм әүҙем ял яратыусыларға хәстәрлек күрелгән: спорт һәм тренажер зал­дары, бассейн, сауналар бар, скандинавса йөрөү, мини-гольф, волейбол, футбол уйнау, саңғыла, ҡаргиҙәрҙәрҙә йөрөү һәм башҡа мөмкинлектәр тыуҙырылған.

Шулай уҡ беҙҙә кинозал, музей, китапхана, картиналар галереяһы, бильярд, боулинг, лазер тиры эшләй, уйын һәм концерт саралары, дискотекалар, экскурсиялар уҙғарыла, Көгөш (Усолка) йылғаһы ярында пляж йыһазландырылған.

– Медицина хеҙмәткәрҙәрен һөнәри байрамы менән ҡотлап, уларға нимәләр әйтер инегеҙ?

– Иң элек “Красноусол” шифа­ханаһы коллективын ҡотлар инем һәм, әлбиттә, барлыҡ медицина хеҙмәткәрҙәрен етеп килгән байрам менән тәбрикләйем. Һәммәгеҙгә ныҡлы сәләмәтлек, һөнәри оҫта­лыҡ, киләсәккә ышаныс, түҙемлек, коллективта яҡшы мөнәсәбәт, именлек теләйем!

– Әңгәмә өсөн рәхмәт.

- Резеда ШӘҢГӘРӘЕВА