Ирәндеккәй буйында, милли байрам түрендә

Тәбиғәттең хозур ерендә, мәғрур Ирәндек тауҙары итәгендә, йәмле Граф күле буйында бер-бер артлы теҙелгән тирмәләр, тирә-йүнде моңға сорнаған йыр-бейеү, кешеләрҙең бер-береһе менән күрешеп, шат йылмайыуы, сабышҡа әҙерләнгән арғымаҡтар, балаларҙың сыр-сыу килеп уйнауы, хеҙмәт алдынғыларының парады менән башланып китте Баймаҡ ерендәге һабантуй.

Хеҙмәт батырҙары тәбрикләнде

Эшсән халҡы, күренекле шәхес­тәре, данлы һәм шанлы тарихы булған, халҡыбыҙҙың боронғо йо­ла-кәсептәрен, йыр-моңдарын бөгөнгө көнгә тиклем бар тулы­лығында һаҡлап ҡалған Баймаҡ ерендә һабантуй бер ваҡытта ла ябай ғына үтмәй. Был юлы ла баймаҡтар үҙ асылына тоғро ҡалды һәм милли байрамды юғары кимәлдә үткәрҙе.

Район халҡының шатлығын уртаҡлашырға Башҡортостан Рес­публикаһы Хөкүмәте Премьер-министры урынбаҫары – БР Хөкүмәте Аппараты етәксеһе Азамат Абдрахманов, туғандаш Илеш районы һәм Ырымбур өлкәһе вәкилдәре килде. Изге традиция буйынса “Һабантуй-2023” байрағын күтәреү хоҡуғы хеҙмәт алдынғылары Варис Ишембәтов менән Зәкирә Ғазинаға бирелде.

– Халҡыбыҙҙың милли байрамын баймаҡтар лайыҡлы ҡаршы­лай, – тип билдәләне үҙенең сәләм­ләү сығышында Азамат Фәрит улы. – Ысынлап та, бында эшһөйәр, талантлы, дәртле, егәрле халыҡ йәшәй. Мин һеҙгә Башҡортостан Башлығы Радий Хәбировтың ҡотлау сәләмдәрен еткерәм.

Вице-премьер бер төркөм хеҙмәт алдынғыларына юғары дәү­ләт наградалары тапшырҙы. Улар араһынан Баймаҡ районы ха­ки­миәте башлығының ауыл хужалығы буйынса беренсе урынбаҫары Азат Шәрипов “Башҡортостан Республи­каһының атҡаҙанған ауыл хужа­лығы хеҙмәткәре” тигән маҡтаулы исемгә лайыҡ булды.

Азат Булат улының барлыҡ хеҙмәт һәм тормош юлы тыуған төйәге менән бәйле. Райондың ауыл хужалығы предприятиеларында белгес һәм рәйес булып бай тәжрибә туплаған Азат Шәри­пов бына байтаҡ йылдар инде хакимиәт башлығының ауыл хужа­лығы буйынса беренсе урынба­ҫары вазифаһын уңышлы баш­ҡара. Ошо йылдар эсендә Азат Булат улы үҙен оҫта ойоштороусы, бул­дыҡлы, халыҡ мәнфәғәтен ҡайғыр­тып эшләгән етәксе итеп танытты, ысын мәғәнәһендә оло ихтирам һәм абруй ҡаҙанды.

Балалар уйындары – байрам биҙәге

Байрам саралары балалар уйындары менән башланып китте. Һәр ерҙә кескәйҙәрҙең шат тауышы, сағыу көлөүе яңғырауы күңелгә әйтеп аңлата алмаҫлыҡ рәхәтлек өҫтәй. Шуға күрә олоһо ла, кесеһе лә – тап бала-саға уйнаған ерҙә. Милли батырыбыҙ Салауат Юлаев­тың тыуған көнөнә арналған театрлаштырылған тамаша ла бик юғары кимәлдә үтте.

Район башлығы Фәнис Әминев етәкселегендәге мәртәбәле ҡунаҡ­тар делегацияһы малай-ҡыҙҙарҙың дәртле сығыштарын ҡараны, улар­ҙың ихласлығына һоҡланып, үҙҙәре лә балалар менән бергә көршәк ватты, уҡ атты. Ни тиһәң дә, һәр кемдең күңелендә бала саҡ онотол­маҫлыҡ тойғолар ҡалдыра шул.

Бигерәк тә Баймаҡ лицей-интер­натының кадет класында белем алыусыларҙың һәм райондың йәш шайморатовсыларының үҙ форма­һында сығыш яһауы йәш быуында илһөйәрлек һәм ватансыллыҡ сифаттарын тәрбиәләүҙең мөһим икәнлеген күрһәтте.

Тирмәләрҙә – халҡыбыҙ асылы

Тирмәләр – һәр һабантуйҙың айырым биҙәге. Быйыл да Ирәндек буйында теҙелгән тирмәләр бай­рам­ға йәм өҫтәп, әллә ҡайҙан үҙенә саҡырып торҙо. Ошонда уҡ ҡул оҫта­ларының, уңған кәсепселәрҙең күргәҙмәһе урын алған. Ауыл билә­мәләре әҙерләгән тирмәләрҙә Уҡы­тыусы һәм остаз йылына арнал­ған күргәҙмәләр булды, хатта совет осорондағы партаға ултырып, мәктәп йылдарын иҫләп алырға мөмкин ине. Мәҫәлән, Татлыбай ауыл биләмәһе хәҙерге һәм элекке осорҙа уҡыусыларҙың нисек белем алыуын сағылдырған бай экспозиция әҙерләгән. Түбә ауыл биләмәһе тирмәһендә махсус хәрби операциянан ялға ҡайтҡан Илшат Мәҡсү­товтың ҡурай уйнауын күреп, уның менән бер аҙ аралашып алырға булдыҡ. Әйткәндәй, яугир “Баш­ҡорт­остан” гәзите редакцияһында ҡунаҡта ла булып өлгөргән икән. Уның әсәһе Фәниә Мәҡсүтова ҡәй­нәһенең аманат итеп ҡалдырған кә­зә­кейен кейеп, ҡулына уҡ-һаҙаҡ тотоп: “Әгәр улыма ярҙам кәрәкһә, мин дә уҡ-һаҙаҡ тотоп, улымды ла, илемде лә яҡларға яуға барасаҡмын”, – ти.

– Был кәзәкейҙе миңә ҡәйнәм Сабира Мәҡсүтова бирҙе, уға ҡәй­нәһе Кәбирә Мәҡсүтова тапшырған. Алла бирһә, Илшат улым кәләш алһа, быуындар аманатына хыянат итмәй, мин уны киленемә тапшы­расаҡмын, – ти Фәниә ханым.

Күргәҙмәләргә килгәндә, төрлө самауырҙарҙан алып шундай нес­кә­лек менән эшләнгән башҡорт ҡатын-ҡыҙҙарының биҙәүестәренә тиклем бар ине. Мәҫәлән, Баймаҡ ҡалаһынан “Хазина” төркөмө ағза­һы Яңылбикә Таһированың ҡул эштәре, Светлана Шульман­дың кейеҙҙән яһалған әйберҙәре, күҙҙең яуын алыр гөл һауыттары бул­һынмы, урындағы эшҡыуарҙарҙың һөт, ит продукцияһы тиһеңме, баһадирҙар эсемлеге ҡымыҙмы – барыһы ла тәҡдим ителде.

Әйткәндәй, тирмәләр буйынса беренсе урынды Күсей ауыл биләмәһе алды.

Бар халыҡ күңел асты

Һәр байрамдың күрке – йыр-моң, бейеү, спорт уйындары, көрәш һәм ат сабышы. Төрлө май­ҙансыҡта башланған ярыш­тарҙа һәр кем күңеленә оҡшағанын һай­лап ҡараны, кемдер ат сабышын һайлаһа, бәғзеләр көрәш майҙа­нына ҡарай атланы, икенселәр бейек ҡолға башына үрмәләгән егеттәрҙе күҙәтте. Ауыш бағанаға менеп, уның осона бәйләнгән һарыҡты Сибай ҡалаһынан 11 йәшлек Искәндәр Әминев алды.

Бер һүҙ менән әйткәндә, бәрә­кәтле Баймаҡ ерендәге һабантуй юғары кимәлдә үтеүе менән йәнә бер тапҡыр ҡунаҡтарҙы хайран итте, улар баймаҡтарҙың ихлас һәм дәртле, уңған һәм сәмле булыуына һоҡланыуын йәшермәне.

- Кәримә УCМАНОВА
Баймаҡ районы