Матурлыҡтың ҡәҙерен бел

Камилә Яҡупова – буласаҡ табип, Башҡортостан дәүләт медицина университеты студенты. Бар яҡтан һәләтле ҡыҙ уҡыуҙа күп уңыштарға өлгәшкән. Йәнә ул – Башҡортостан Республикаһында “Йыл студенты-2022” Рәсәй милли премияһына “Стоматология” номинацияһында еңеүсе, Мәскәү ҡалаһында “Йыл студенты-2022” Рәсәй милли премияһы һәм Бөтә Рәсәй “Мин – профессионал” студенттар олимпиадаһы финалисы ла. Уҡыуҙан тыш, уңған ҡыҙ үҙен төрлө матурлыҡ конкурстарында ла һынап ҡарай. “Мисс БДМУ” конкурсында “Мисс артислыҡ һәләте” исеменә лайыҡ була. “Мисс берҙәмлек-2023” республика этник матурлыҡ һәм талант конкурсында “Этно-һылыуҡай” һәм “Мисс тамашасылар һөйөүе” номинацияларында еңеү яулай. Һуңғы конкурс хаҡында Камилә ЯҠУПОВА менән әңгәмә ҡорҙоҡ.

– Был конкурсҡа һине ниндәй маҡсат һәм хыял алып килде?

– Матурлыҡты күргән, гүзәллекте белгән һәм аңлаған, уға ынтылған, нә­фислектең ҡәҙерен белгән кешенең күңеле лә матур, нескә, хискә бай, рух­лы һәм намыҫлы була. Мин ма­турлыҡ төшөнсәһендә ҡатын-ҡыҙҙың сибәрлеген генә күҙ уңында тотмайым. Матурлыҡ – ул тышҡы ҡиәфәт кенә түгел, күңел күркәмлеге, йәмғиәт­тә үҙ-үҙеңде ипле, әҙәпле, тәртипле тота белеү, рухи байлыҡ – бы­на ошо сифаттарҙы үҙ эсенә алған да инде был конкурс. Иң мөһиме – был конкур­ста төрлө милләт ҡыҙҙа­рының ҡатнашыуы, туған телен, хал­ҡының мәҙәниәтен, сәнғәтен һаҡлауы. Мин дә нәҡ туған башҡорт телемде, халҡымдың иҫ киткес бейеү сәнғәтен, милли йолаларын күрһәтеү һәм яҡлау маҡсатында сыҡтым сәхнәгә. Әйткән­дәй, миңә сәхнәлә Башҡортостандың атҡаҙанған артисы Нәсимә Тимерова етәкселегендәге “Ауаз” фольклор ансамбле ярҙам итте. Уларға ҙур рәхмәт.

– Нимә ул матурлыҡ? Һылыу, гүзәл һүҙҙәренең мәғәнәһен нисек аңлайһың?

– Был һорауға һәр кем үҙенсә яуап бирәлер. Был донъяға тыуғандан алып беҙҙе матурлыҡ уратып ала. Бәләкәй саҡта уйынсыҡтарың матур була, тыуған ҡалаң иң күркәме булып тойола, ауылға ҡайтһаң, атай-әсә­йең­дең тыуған ауылы иҫ китмәле булып күре­нә, тәбиғәткә сыҡһаң, уның хозур­лы­ғынан күҙҙәр ҡамаша. Үҫә килә ке­ше­нең тышҡы гүзәллеген күрәбеҙ. Тик был донъяның асылына төшөнә баш­лағас ҡына, тирә-яҡтағы кешеләр­ҙең эске, йәғни күңел матурлығына иғти­бар итә башлайбыҙ. Был матурлыҡ ке­ше­нең тәрбиәлеле­генә, аҡылына, үҙ-үҙен тотошона бәйләнгән. Тышҡы яҡтан иҫ киткес ҡупшы булып та, ҡим­мәт­ле, затлы, зауыҡлы кейемдәр кейеп тә, ҡылыҡ-фиғеле, үҙ-үҙен дорфа, эре итеп тотоуы, эргә-тирәләге кеше­ләргә һауалы ҡараш ташлауы матур­лыҡ һаналмай, әлбиттә. Бындай кеше­ләр кире ҡараш тыуҙыра. Тышҡы ҡиә­фәтең дә, күңел торошоң да, уйҙарың да матур булһын. Донъялағы һәр кеше үҙенсә һылыу, күркәм, гүзәл. Берәүҙәр эше менән матур, икенселәр оҫталығы менән һоҡланғыс, күп бала үҫтергән ҡатындар үҙҙәренсә гүзәл...

“Һылыу” һүҙе күберәк кешеләргә ҡа­ғылһа, “матур” һүҙе тирә-яҡты тасуирлай.

– Конкурста һәм, ғөмүмән, тормошта уңыш сере нимәлә?

– Был донъяла һәр кешенең уңышлы булғыһы киләлер. Мәктәпте, юғары уҡыу йортон уңышлы тамам­ларға, һәй­бәт эшкә урынлашыр­ға, татыу ғаилә ҡорорға, ғөмүмән, тормошта бә­хетле булырға. Уңышлы булыу өсөн иң беренсе сиратта маҡсат ҡуйырға кәрәк. Уға өлгәшеү уңыш була ла инде. Маҡсаттарҙың өлгәшә алырлыҡ булыуы мөһим, үҙеңдең көсөң, хәлең етәрлек булһын. Мәҫәлән, мәктәптә яҡшы уҡырға тигән маҡсат ҡуяһың икән, бының өсөн бер аҙ тырышлыҡ ҡына кәрәк. Был сифат уңышҡа алып килә. Тырышлыҡҡа инде үҙ көсөңә ышаныу ҙа өҫтәлһә, бигерәк тә күп үрҙәргә өлгәшергә мөмкинлек арта. Һәр ерҙә лә ҡурҡмайынса, тәүәк­кәл, тырыш булып, үҙ-үҙеңде яҡлап, һәр ғәмәлгә яуаплы ҡарап эш итә белһәң, мотлаҡ уңышҡа өлгәшәсәкһең. Мин быны үҙемдә һынап ҡарағаным бар.

– Күңелең ял итерлек мауығы­уың бармы? Тиҫтерҙәреңә буш ваҡытта нимә менән шөғөл­ләнергә кәңәш итер инең?

– Әлбиттә, бар. Бәләкәй саҡтан бейеү менән шөғөлләнәм. Мәктәптә уҡыған йылдарҙа башҡорт телендә үткәрелгән конкурстарҙың, күп төрлө сараларҙың алып барыусыһы булдым. Тел һәм әҙәбиәт, мәҙәниәт, тарих менән ҡыҙыҡһынам, сит телдәрҙе тә­рән өйрәтеүсе гимназияла уҡыған­лыҡтан, бер нисә телде беләм. Баш­ҡорт теле буйынса олимпиадалар һәм төрлө конкурстар еңеүсеһемен. Биге­рәк тә туған телемдә шиғырҙар ятлау ныҡ оҡшай, Өфө ҡалаһының 3-сө гим­назияһында башҡорт теле һәм әҙәбиә­тенән белем биргән уҡытыусым Фән­гизә Рафаил ҡыҙы Нафиҡоваға рәх­мәтлемен. “Илһам” нәфис һүҙ һәм “Урал батыр” эпосын яттан һөйләүсе­ләр конкурстарында еңеү яуланым. Йәштәргә “дөрөҫ һәм сәләмәт тормош алып барығыҙ” тип әйткем килә. Ялҡау булмаһындар, маҡсат ҡуйып, уға өл­гәшер өсөн бар һәләтен, бар кө­с­өн, тәүәккәллектәрен һалһын­дар. Спорт менән шөғөлләнеү, яҡ­шы эштәр ҡылыу, сит телдәрҙе өй­рә­неү һәм шул уҡ ваҡытта туған те­лең­де белеү мөмкинлектәреңде киңәйтә.

– Афарин, Камилә! Артабан да уңыштар юлдаш булһын!

Рүзилә ҠОЛӨМБӘТОВА