Тарихи хәтерҙе һаҡлау мөһим

Рәсәй һәм Беларусь йәштәре форумы сиктәрендә Өфө-Брест-Минск Халыҡ-ара йәштәр телекүпере форматында ҡатнашыусылар берлектәге проекттарҙы, эҙәрмәндәр экспедицияһын тормошҡа ашырыуҙы һәм илһөйәрлек туризмын үҫтереүҙе тикшерҙе. Сарала эҙәрмән отрядтары, йәштәр йәмәғәт берләшмәләре, ирекмәндәр ойошмалары етәкселәре һәм ағзалары, урта һәм дөйөм профессиональ белем биреү вәкилдәре ҡатнашты. Сессияның модераторы булып Башҡортостан Республикаһының Йәштәр хөкүмәте рәйесе Вилдан Иҫәнгилдин сығыш яһаны.

– Өфө ике туғандаш төбәкте йәлеп итеү һәм берләштереү урынына әүерелде. Ватанға белем һәм һөйөү граждандар йәмғиәтен, гражданлыҡ донъяға ҡарашты формалаштырыуҙың нигеҙе булып тора. Бөгөн патриотизм – балаларыбыҙҙы, йәштәребеҙҙе тәрбиәләүҙең мөһим нигеҙе. Дөйөм тарихыбыҙ, геройҙар мираҫыбыҙ, мәҙәни үҙенсәлектәребеҙ бар. Артабан халыҡ-ара хеҙмәттәшлекте тикшереү өсөн йыйылдыҡ, - тип билдәләне Вилдан Иҫәнгилдин.

Башҡортостан Республикаһында «Рәсәй эҙәрмәндәр хәрәкәте»нең төбәк бүлексәһе советы рәйесе Владимир Волков бүлексәнең эше тураһында һөйләне, уның бурысы – Ватанды һаҡлағанда һәләк булғандарҙың иҫтәлеген мәңгеләштереү.

– Белоруссиялағы коллегаларыбыҙ менән тығыҙ бәйләнештәбеҙ. Беҙ Белоруссиянан Рәсәй Федерацияһы биләмәһенә саҡырылған һалдаттарҙы табабыҙ. Беҙ һәләк булған кешенең туғандарына документтар йәки шәхси әйберҙәр тапшырабыҙ, – тине Владимир Волков.

Йәштәр форумында ҡатнашыусылар менән эҙәрмәндәр хәрәкәтен үҫтереү тәжрибәһе хаҡында Беларусь Республикаһы Витебск өлкәһенән «Ватанға хеҙмәт итәм» хәрби-патриотик клубы ағзаһы һәм әүҙем эшмәкәре Арина Алейникова ла уртаҡлашты.

Юлай Кәримов фотоһы.