Фидарис ҒАРИПОВ: “Хужалыҡтың киләсәге өмөтлө”

Балтас районының Фрунзе исемендәге яуаплылығы сикләнгән ойошмаһы етәксеһе, Башҡортостандың ауыл хужалығы хеҙмәткәре Фидарис Ғариповтың беҙҙе ошондай һүҙҙәр менән ҡаршылауы албырғатып ҡалды. Йыш ҡына “ауылдың киләсәге юҡ, ауыл хужалығы менән шөғөлләнеү файҙа килтермәй” тигән фекер ишеткәс, Фидарис Әлзәм улының ҡарашы ҡыуандырҙы.

– Ауылдың киләсәге ҙур, хужалыҡтар йәшәйәсәк. Быны­һына иманым камил. Беҙҙә халыҡ тырыш, эшләргә әҙер, – тип яҡташтарын маҡтап телгә алды хужа.

Фидарис Әлзәм улы ҡырҡ йылға яҡын ауыл хужалығы тармағында эшләй. Хеҙмәт юлын “Танып” колхозында зоотехник булып башлай. 1985 йылдан ошо хужалыҡтың алыштырғыһыҙ етәксеһе.

– Сәсеү майҙаны йәмғеһе 4 мең гектар тәшкил итә. Ужым культураларына өҫтөнлөк бирәбеҙ. Арыш – 900 гектарҙа, иген – 700, вика – 850, һоло – 400, бер йыллыҡ үләндәр 800 гектар майҙанда сәселде. Барлыҡ эш үҙебеҙҙең техника ярҙамында атҡарыла. Меха­низа­торҙар Рәдис Сухияров, Илдар Асҡаров, Ғәйетхан Шәйнуров, Флорис Әхийәров, Фиғәт Әхмәтйәнов, Рәдис Зыяетдиновтар хужалыҡта оҙаҡ йылдар эшләй һәм бурыстарын еренә еткереп атҡара. Баҫыуҙа иң ҡыҙыу мәлдә райондың ауыл хужа­лығы техникумы курсанттарын саҡырып алабыҙ. Улар ҙа бик тырышып ярҙам итә, өлкән хеҙмәттәштәренән күпте өйрә­неп ҡалырға тырыша, – тип һөйләй Фидарис Әлзәм улы.

Хужалыҡ етәксеһе билдә­лә­үенсә, ул эш башлаған йылдар менән сағыштырғанда, хәҙер ауыл хужалығы тарма­ғында эшләү күпкә ҡыҙыҡ­лыраҡ һәм һөҙөмтәлерәк. Көслө тракторҙар элеккелә­ренән байтаҡҡа ҡеүәтлерәк. Сәсеү комплекстары ла ышаныслы. Боғҙан һәм Иҫке Тимкә ауылдары биләмәһендә урын­лашҡан хужалыҡта бөгөн 42 кеше эшләй. Сәсеү һәм уңыш йыйыу ваҡытында һандар бер аҙ артып китеүе ихтимал.

Хужалыҡта мең башҡа яҡын ҡара-сыбар тоҡомло һыйыр малы тоталар. Шулар­ҙың 400-ө – һауын һыйыр. Һөттө Бөрө һөт заводына тапшыралар. Малсылыҡ хужалы­ғы булып теркәлгән ойошма­ның заман һынауҙарын лайыҡлы үтәсәгенә шик юҡ.

Лилиә НУРЕТДИНОВА