Яугирҙәргә ярҙам итергә әҙер

Өфөнән 20 йәшлек Артур Ғәлиев махсус хәрби операцияла тәүге көндәренән үк ҡатнаша. Ул быға тиклем 104-се мәктәптә, Өфө радиоэлектроника, телекоммуникациялар һәм хәүефһеҙлек колледжында белем алған, тхэквондо буйынса спорт мастерлығына кандидат исеменә лайыҡ булған, Рәсәй Ҡораллы Көстәре сафында хеҙмәт иткән, шунда ике йылға контракт төҙөгән.

Бер ай үткәс, Артур Ҡыҙыл байраҡлы Ҡазан юғары танк команда училищеһына ҡабаттан уҡырға ебәрелә. Ә 23 февралдә иһә уларҙың хәрби подразде­лениеһы Луганск һәм Донецк халыҡ республикаларына йүнә­лергә бойороҡ ала.

2022 йылдың 25 майы прапорщик Ғәлиевтең мәңгегә иҫен­дә ҡала. Уларҙың хәрби төркөмө бер ауылда урынлашырға тейеш була, әммә дошмандар асҡан ҡы­ҙыу утҡа тап була. Шул ва­ҡытта йәш егет ысын мәғәнә­һендә батырлыҡ күрһәтә: ике нацисты юҡ итә, йәрәхәтләнгән дуҫын ут эсенән алып сыға һәм үҙ позицияһына кире ҡайта. Дошмандарҙың танктан атыуын ишетмәй – яҡында ғына  снаряд шартлауын күрә. Артур тубыҡлана һәм ҡулының ҡан тамырында ғына эленеп тороуын күрә.

Егет һөйләүенсә, әгәр ҙә снаряд ярсығы артерияны ла өҙһә, ул күп ҡан юғалтыуҙан һәләк булыр ине. Бәхеткә күрә, бындай хәл булмай. Шулай ҙа ул ваҡыттағы һәр секунд мәңгелек булып тойола: күҙ алдары ҡараңғылана, аяҡтары тотмай... Тик ул, бер нимәгә ҡарамайынса, үҙ төркөмөнә барып етергә ҡарар итә. Яу яланында табылған документтарын алып, иптәштәре янына юл тота. Хәтерләүенсә, уға кескәй ҡустылары тураһында уйлау көс биргән: оло йәшкә еткән ата-әсәһенә уларҙы аяҡҡа баҫтырыу ныҡ ауырға төшөр ине.

Артур эвакуация пунктына ҙур ауырлыҡ менән барып етә. Табиптар Ғәлиевтең ғүмерен ҡотҡа­ра, тик ҡулын ҡырҡырға тура килә. Башҡа берәү булһа, күңел төшөнкөлөгөнә бирелер ине, бәлки. Ә Өфө егете өсөн иһә нәҡ шул көндән йәнә бер мөһим эш башлана.

Артур ”Башҡортостан Респуб­лика­һының ышаныслы тылы” фондында эшләй башлай. Был фонд махсус хәрби операцияла ҡат­нашыусыларҙың һорауҙары буйынса кәрәк-яраҡ йыя. Унда барыһы ла бар: өләсәйҙәр бәйлә­гән ойоҡбаштарҙан башлап, квадрокоптер һәм дизель генератор­ҙарына тиклем. Өҫтәүенә, операция барған ваҡыт эсендә республика халҡы фондҡа ете миллион һумдан ашыу аҡса йыйған, йәғни кешеләр үҙҙәре теләп кәрәкле әйберҙәр, аҡса менән дә ярҙам итә. Ғәлиев үҙе лә йәрә­хәт алған өсөн түләнгән аҡсаның бер өлөшөн – миллион һумды – махсус хәрби операцияла ҡатна­шыусыларға кәрәк-яраҡ алыр өсөн ебәрә.

 – Бында ла уяу булырға кәрәк, – ти һалдат. – Мәҫәлән, сират­тағы ғариза килһә, мин, ысынлап та беҙҙең яугирҙәр ебәргәнме икәнен белер өсөн, командование менән бәйләнешкә сығам. Бик йыш ҡына бындай үтенестәр дошмандарҙан да килә. Эйе, улар беҙгә зыян килтереү өсөн барыһын да эшләй: яу яланында беҙҙең һалдаттарҙың документтарын табып алып, уларҙың исеменән ғариза яҙа, гуманитар ярҙамды контролгә алынған Украина ерҙәренә ебәреүҙе һорай, шуға күрә һәр ваҡыт шылтыратып, асыҡлыҡ индерәм.

Ғәлиев әйтеүенсә, бөгөнгө тормош беҙҙе уяуыраҡ булырға өйрәтә, шуға күрә ул федераль телеканалдарға һәм Рәсәй матбуғатына ғына ышанырға саҡыра.

– Шулай уҡ беҙҙең “Сумас­шедший пират” исемле телеграм-каналыбыҙ бар. Мин унда фронт­тағы тормош тураһында һөйлә­йем, мобилизацияланған һалдат­тарға һәм шулай уҡ кире әйләнеп ҡайтҡандарға кәңәш бирәм, яу яланынан роликтар һалам.

Үҫеп килгән быуынға махсус хәрби операция тураһында дөрөҫ мәғлүмәт еткереү өсөн, Артур Ғә­лиев йыш ҡына Өфө уҡыусы­лары менән студенттары алдында сығыш яһай. Өс тиҫтәнән ашыу мәктәп, колледж һәм юғары уҡыу йорттарында булған да инде.

 – Улар менән аралашыу барышында шуға инандым: ҡайһы берәүҙәр донъяла һәм илебеҙҙә нимә барғанын һаман аңлап етмәй, – ти ул. – Улар өс ай алғы һыҙатта булған, махсус хәрби операцияла ҡатнашҡан кешенең һөйләүен ихлас тыңлай.

Батырлыҡ, генерал Шайморатов һәм “Хәрби хеҙмәттәре өсөн” ордендары менән бүләк­лән­гән прапорщик Ғәлиев күптән түгел “Бер­ҙәм Рәсәй” партияһы­нан БР Дәүләт Йыйылышы – Ҡоролтай депутаттарына алдан тауыш биреүендә ҡатнашҡан.

– Махсус хәрби операция яугир­ҙәренә уларҙы бөгөн нимә борсо­ғанын һөйләргә мөмкинлек бирергә кәрәк, – тине ул. – Әгәр ҙә республика дәүләт власының юғары ҡануниәт органында үҙе­беҙҙең вәкилебеҙ булһа, ғәҙел булыр ине. Мин закон сығарыу кимәлендә яугирҙәргә ярҙам итер­гә, уларҙың мәнфәғәттәрен яҡларға һәм республика халҡы­ның наказдарын үтәргә әҙермен.

Был башланғыста уға ата-әсәһе, дуҫтары һәм һөйгән ҡыҙы Виолетта ярҙам итә. Улар билдәләүенсә, Артур бик ҡыйыу һәм көслө рухлы.

Гүзәлиә ЗӘЙНУЛЛИНА