Бер осрашыу – үҙе бер ғүмер

Йәй миҙгеле Әхмәтйәновтар өсөн иҫтәлекле булды – Бөрйән районының Исламбай ауылында Һиҙиәт олатайҙың вариҫтары шаулап-гөрләп Шәжәрә байрамын үткәрҙе.

Шәжәрә – ул ырыу-ҡәбиләң­дең килеп сығышы, уның тар­маҡланыуы, таралыуы ха­ҡын­да мәғлүмәт, шуға күрә эштең башланғысы Әхмәтйә­новтар шәжәрәһен төҙөү булды. Был йәһәттән Миңзәлә Бәшир ҡыҙы Харрасованың тырышлығы баһаға лайыҡ. Ул оло быуын инәй-бабайҙарҙан ишетеп яҙып алған шәжәрәне, республика архивтарына мөрәжәғәт итеп, документтарға таянып, һәр быуынды барлап эшләп ҡуйҙы. Әйткәндәй, Әхмәтйәновтар нәҫеленең башы Монасип ауылына барып тоташыуы беҙҙең өсөн асыш булды.

Исламбай ауылында йәшәгән Рәйлә менән Ирек Әхмәт­йә­новтарҙың “Әйҙәгеҙ, йыйылайыҡ” тигәнен дәррәү күтәреп алып, тиҙ арала ойоштороу комитеты төҙөлдө, көнө билдәләнде, әҙерлек эштәре башланды. Ошо урында был байрамды юғары кимәлдә үткәреүгә үҙ өлөшөн индергән, ҙур яуаплылыҡ менән ҡараған һәр туғаныбыҙға рәхмәт һүҙҙәре еткереп, иҫәнлек-һаулыҡ теләйбеҙ. Шундай оло, сауаплы эш атҡарып сыҡты улар. Мо­ғайын, Һиҙиәт олатайҙың, уның быуынын дауам иткән бала­ларының рухтары ла ҡыуан­ғандыр, сөнки нәҫел ағасыбыҙ нығынды, туғанлыҡ көсө арты.

Сара дәртле концерт менән башланып китте. Бөтә ырыуы­быҙға, илебеҙгә яҡты көндәр, тыныс тормош теләп, мулла Юлай Ғәлиуллин доға ҡылды. Артабан Һиҙиәт ола­тайҙың ете балаһының ғаилә­ләре ҙур баннерға эшләнгән шәжәрә янына – сәхнәгә күтәрелеп, үҙҙәре­нең нәҫел-нәсәбен барланы, туғанлыҡ ептәрен асыҡланы.

Әхмәтйәнов фамилияһын йө­рөтөүселәр, иң оло һәм иң кесе вариҫ вәкилдәре, татыу ғүмер иткән юбиляр ғаилә парҙары, иң йәш ғаилә пары, юбилей йәш­тәрен билдәлә­гәндәр тәбрикләп бүләкләнде. Балалар өсөн дә мауыҡтырғыс уйындар ойошторолдо: улар зирәклектә, сос­лоҡта, етеҙлектә ярышып, бүләк­тәр алып ҡыуанды.

Һиҙиәт олатай вариҫтары, бер-береһе менән яҡындан танышып, аралашып, уйнап-көлөп, йырлап-бейеп, рәхәтләнеп ял итеп, тәмле аш менән һыйланды. Туғандарыбыҙ – Ләйлә Хәйбул­лина менән Нурсилә Әминева һыйлаған ҡорбан аштары ҡабул булһын. Шәжәрә байрамынан иҫ киткес рух күтәренкелеге, туған­лыҡ, берҙәмлек тойғолары алып таралыштыҡ.

Бер осрашыу – үҙе бер ғүмер. Сараға килгән һәр береһенә оло рәхмәт. Килә алмай ҡалған туғандар менән дә, Аллаһ бирһә, күңелле мәлдәрҙә генә күрешеү­ҙәр насип булһын. Бер-бере­беҙҙе беләйек, таныйыҡ, аралашып йәшәйек. Нәҫел ағасыбыҙ тармаҡланһын, туғанлыҡ ептәре, быуындар сылбыры мәңге өҙөлмәһен!

 
Нурзилә СОЛТАНҒУЖИНА

Бөрйән районы.