Мөмкинлектәре сикләнгән пассажирҙар өсөн махсус зал

Залда вокзалдың бар эшен күрһәтеүсе интерактив экран ҡуйылған, уның аша тимер юлы транспорты хәрәкәте теҙмәһе менән танышырға, поездарҙың маршрутын күрһәтеүсе карта, ярҙам кәрәк булған осраҡта саҡырыу төймәһе бар.

Перронға йәки ҡалаға сығыу буйынса видео- белешмә яҙҙырылған. Коляскала йөрөүсе граждандарға ҡулланыу еңел булһын өсөн төймәләре аҫтараҡ урынлаштырылған. Күреү һәләте түбән булыусылар өсөн Брайль шрифтлы яҙыуҙар һәм тауыш ярҙамсыһы бар хәрәкәтте һөйләп ишеттереп тора. Электр коляскала хәрәкәт итеүселәргә, аккумуляторҙарына көс йыйҙырыу урыны бар. Бында шулай уҡ тимер юлы экспонаттары, поезд моделдәренән торған күргәҙмә, балалар өсөн уйын майҙансығы булдырылған. Яңы уңайлыҡтарҙы граждандар үҙҙәре лә һынап ҡараны, улар араһында инвалид коляскала хәрәкәт итеүселәр, йөрөтөүсе эт менән килеүселәр ҙә булды.

Бындай уңайлыҡтар мөмкинлектәре сикләнгән граждандар өсөн өйҙә бикләнеп ултырмаҫҡа, ә республика һәм ил буйлап сәйәхәт итергә булышлыҡ итә.

Был һүҙҙәрҙе ҡала советы депутаты Владимир Петров та дәлилләп, Стәрлетамаҡта мөмкинлектәре сикле булған граждандарҙың әүҙем тормош алып барыуы һәм тимер юлдары транспорты менән алыҫ ҡалаларға барып ярыштарҙа ҡатнашыуы, сәйәхәт һәм ял итеүҙәре тураһында әйтеп үтте.