Яугирҙәребеҙҙе ярҙамһыҙ ҡалдырмайбыҙ

18 октябрҙә республика Башлығы Радий Хәбиров ҡушыуы буйынса Башҡортостандан махсус хәрби операцияла ҡатнашҡан ирекмәндәр һәм мобилизацияланғандар өсөн 97-се гуманитар ылау ебәрелде.

Хәрби хеҙмәткәрҙәргә адреслы ярҙамды республиканың 10 муниципаль районы ойошмалары, йәмәғәт берекмәләре, шулай уҡ битараф булмаған граждандарҙан туплаған.

Колонна 64 кешенән һәм 32 берәмек техниканан, шул иҫәптән республика тарафынан бүленгән 18 ҙур йөк автомобилдәренән һәм 14 оҙатыусы автомобилдән тора.

Йөк составына 21 автомобиль, шулай уҡ ағас материалдары (бүрәнә, ағас, таҡталар) 75 кубометр, йылытыу өсөн 64 кубометр утын, квадрокоптерҙар, тепловизорҙар, рациялар, генераторҙар, тимер мейестәр, бензин менән эшләгән бысҡылар, электр ҡорамалдары, маскировка селтәрҙәре, төҙөлөш материалдары, һыу өсөн мискәләр, инструменттар, аҙыҡ-түлек, кейем, медикаменттар, туғандарынан посылкалар һәм башҡалар инә.

Республиканың Торлаҡ-коммуналь хужалыҡ министрлығынан һыу үткәргес торбалар, торлаҡ-коммуналь хужалыҡ коммуникацияларын ремонтлау өсөн арматура ебәрелгән. Башҡортостан Республикаһы Хөкүмәте Премьер-министры урынбаҫары Ирек Сәғитов сираттағы гумконвойҙы әҙерләүҙә ҡатнашҡандарҙың барыһына ла рәхмәт әйтте һәм республиканан ярҙам даими күрһәтелә, тип белдерҙе.

Фото: Башҡортостан Республикаһының Ғәҙәттән тыш хәлдәр буйынса дәүләт комитетының матбуғат хеҙмәтенән.