Мария Коломасоваға – 100 йәш!

Иглин районы хакимиәте башлығы Гүзәл Насирова "Бәйләнештә" социаль селтәрендә 100 йәшлек Мария Коломасованы ҡотлаған.

– 100 йәш – тотош быуат! – тип яҙған Гүзәл Насирова. – Һуғыш михнәттәре, үҙгәртеп ҡороу осоро һәм башҡалар. Шул ваҡытта ла позитив булып ҡалыу һәр кемгә лә бирелмәйҙер. Ә бына Мария Геннадьевна һәр саҡ көләс йөҙлө, изге күңелле булып ҡалған.

Мария Коломасова – Бөйөк Ватан һуғышы ветераны. Ул тыумышы менән Иванов өлкәһенең Плес ҡалаһынан. Мария Геннадьевна госпиталдә дауаланған Иглин кешеһе менән танышып, һуңынан ғаилә ҡорғандар. Әйткәндәй, 60 йыл иңгә-иң терәшеп йәшәгәндәр. Улар ике балаға ғүмер бүләк иткән, әле инәй ейән-ейәнсәрҙәр, бүлә-бүләсәрҙәр, тыуа-тыуасарҙар тип бауыр баҫа.

"Башҡортостан" гәзите лә Мария Геннадьевнаны күркәм юбилейы менән ҡотлай, тыныс ҡартлыҡ теләй.

Фото: Гүзәл Насирова.