Был юлы ир-егеттәр Сибайға йыйыла

5 мартта Сибайҙа Башҡортостан ир-егеттәре советының зона форумы үтә. Ойоштороусыһы - «Башҡортостан Республикаһының ирҙәр советы» атай ролен күтәреү буйынса республика йәмәғәт ойошмаһы.

Форумда түбәндәге темаларға арналған дүрт секция эшләйәсәк: 1) экологияны һаҡлау һәм тирә-яҡ мөхитте һаҡлау мәсьәләләре, 2) сәләмәт йәшәү рәүеше, спорт һәм суррогат алкоголь һатыуға ҡаршы көрәш, 3) эшҡыуарлыҡты һәм туризмды үҫтереү, 4) йәштәргә патриотик тәрбиә һәм хоҡуҡи белем биреү.

Сарала ҡатнашырға Сибай ҡалаһынан, Баймаҡ, Хәйбулла, Йылайыр, Ейәнсура, Бөрйән, Әбйәлил, Белорет һәм Учалы райондарынан кешеләр саҡырыла.

«Был Урал аръяғында ошондай тәүге ҙур сара була. Унда беҙ диалог режимында төбәк өсөн көнүҙәк мәсьәләләрҙе тикшерәбеҙ. Минең өсөн ер аҫты байлыҡтарын файҙаланыу темаһы айырыуса мөһим, был өлкәләге бер нисә закон проекты өҫтөндә эшләйем. Ер аҫты байлыҡтарын файҙаланыу мөнәсәбәттәрен көйләү өлкәһендә РФ Дәүләт Думаһында ниндәй эш алып барыуыбыҙ, ерҙәрҙе файҙаланыуға экологик контроль проблемаларын хоҡуҡи акттар кимәлендә нисек хәл итергә мөмкин булыуы хаҡында һөйләгем килә.

Барлыҡ фекерҙәрҙе, шул иҫәптән тәнҡитте тыңларға һәм ишетергә әҙербеҙ. Бәлки, һеҙҙең ҡайһы бер тәҡдимдәрегеҙ буйынса ҡарау өсөн федераль закон проекттары индерелер», - тип билдәләй ваҡиға инициаторы, Дәүләт Думаһының экология, тәбиғәт ресурстары һәм тирә-яҡ мөхитте һаҡлау буйынса комитеты ағзаһы, Башҡортостандың Ирҙәр советы рәйесе Зариф Байғусҡаров.

3 мартҡа тиклем һылтанма буйынса ttps://docs.google.com/forms/d/e/1FAIpQLSek1vwWvcD9BMONxeYC6j8iDTABfBsKvHc-rikHDR5WM_1yGQ/viewform  теркәлеү формаһын тултырырға кәрәк. Заявкала һорауҙарығыҙҙы һәм темаларығыҙҙы яҙып ҡалдыра алаһығыҙ.

Инеү бушлай. Урын: Сибай концерт-театр берекмәһе, Горький урамы, 27. Ваҡыты: форум иртәнге сәғәт 11-ҙән көндөҙгө 4-кә тиклем үтә, иртәнге 10-дан иртәнге 11 тула 15 минутҡа тиклем теркәлеү мотлаҡ.

Фото: "Бәйләнештә".