Госпиталдәргә ярҙам итәләр

Дыуан районына эш сәфәре мәлендә “ДОМ”( доброта, отзывчивость, милосердие) халыҡты социаль хеҙмәтләндереү үҙәге хеҙмәткәрҙәренең махсус хәрби операциялағы һалдаттарға ярҙам итеүе буйынса ирекмәнлек эшен алып барыуҙарын ишетеп, уларҙы ла күреп сыҡтыҡ. Оло йәштәгеләрҙе, инвалидтарҙы хеҙмәтләндереү менән шөғөлләнгән ойошма хеҙмәткәрҙәрендә изгелек итеү - булмыштарында.

 “ДОМ” үҙәге директоры Вера Глушкова әйтеүенсә, был йүнәлештә эште  мобилизация иғлан ителеү менән башлап ебәргәндәр. Тәүҙә йылы кейемдәр туплап ебәреү менән шөғөлләнһәләр, аҙаҡ маскировка селтәрҙәрен эшләүгә тотонғандар. Йылы ойоҡбаштар бәйләгәндә оло йәштәге инәйҙәр ҙә ситтә ҡалмай. Ер участкаһына йәшелсә сәсеп, үҫтереп, уны  һатылған аҡсаға яугирҙәргә кәрәк-яраҡ алып та изгелек ҡылалар.

Хәҙерге көндә үҙәк хеҙмәткәрҙәре госпиталдәргә ярҙам итеү йүнәлешендә эш алып бара. Уларҙың тырышлығы менән әллә күпме шприц, бинт кеүек кәрәкле әйберҙәр махсус хәрби операция барған биләмәгә оҙатыла. Госпиталдәр менән  бәйләнештә булып, нимәләр кәрәклеген дә һорашып торалар.

– Аҙаҡҡы тапҡыр Донецк, Луганск халыҡ республикаларындағы госпиталдәргә ярҙам оҙаттыҡ. Күп осраҡта скальпель, шприцтар, бәйләү пакеттары кеүек әйберҙәр һорайҙар. Яугирҙәребеҙҙе хәстәрләүҙе күңел биреп башҡарабыҙ. Артабан да ярҙамыбыҙҙы туҡтатмаясаҡбыҙ, – тине Вера Павловна.

Яралы һалдаттар тураһында хәстәрлек күргән ошондай замандаштарыбыҙ изгелектең өлгөһө.

Автор фотоһы.