Билдәле яҡташыбыҙ хөрмәтенә

Федоровка районының Покровка ауылында Рәсәйҙең атҡаҙанған геологы, Диңгеҙ арктика геолог-разведка экспедицияһының генераль директоры, Антарктика шельфенда геофизик тикшеренеүҙәр үткәргән беренсе совет диңгеҙ экспедицияһы етәксеһе Геннадий Семенович Казаниндың тыуған көнө хөрмәтенә Покров фестивале үтте.

Фестиваль халыҡты яңынан берләштерҙе. Байрамға Федоровка кешеләре һәм ҡунаҡтар, Геннадий Семеновичты белгәндәр, яҡташтар, уның эшен дауам иткән улы  Алексей Казанин һәм ҡатыны Марина Алексеевна килде.

Сарала Башҡортостан Хөкүмәте Премьер-министрының беренсе урынбаҫары – иҡтисади үҫеш һәм инвестиция сәйәсәте министры Рөстәм Моратов, Мурманск өлкәһе губернаторы урынбаҫары – һаулыҡ һаҡлау министры Дмитрий Панычев, Афондағы архимандрит Изге Пантелеймон монастырында Игумен Русский ярҙамсыһы Евлогия, Рәсәй Федерацияһында монастырь вәкиле Игорь Фролов һәм башҡа дин әһелдәре ҡатнашты.

Покров фестиваленә ярашлы  Геннадий Семенович иҫтәлегенә  күп төрлө саралар үтте. Ғибәҙәтханала изге литургиянан һуң ҡунаҡтар хачкара асыу тантанаһында булды. Ул тәрене һүрәтләгән таш стеланы кәүҙәләндерә. Аҙаҡ фестивалдә ҡатнашыусылар зыяратта булып, Геннадий Семеновичты иҫкә алды, уның бюсына сәсәкәләр һалды. Мәҙәни программа  бик бай булды, райондың милли ижади коллективтары һәм үҙешмәкәр түңәрәктәрҙә ҡатнашыусылар бай концерт программаһы менән сығыш яһаны. Г.С.Казанин исемендәге  Покров фестивале төрлө милләт һәм дин кешеләренең осрашыу урынына, дуҫлыҡ һәм яҡшы мөнәсәбәт мөхитенә  әүерелде.

Фото:Федоровка районы хакимиәте.

«