Был төбәктәр ярҙам аласаҡ

Бөгөн Башҡортостан Башлығы Радий Хәбиров аҙналыҡ кәңәшмәлә республиканың көньяғындағы муниципалитеттарҙы үҫтереүҙең мөһим мәсьәләләрен оператив хәл итергә ҡушты.

Мәҫәлән, Учалыла һыу үткәргесте реконструкциялау талап ителә. Хәтерегеҙгә төшөрәбеҙ, төбәк етәксеһе был теманы 2024 йылдың ғинуарында Учалы районы халҡын ҡабул иткән саҡта тикшергәйне. Ғәмәлдәге һыу алыу ҡоролмаһы 1961 йылда файҙаланыуға тапшырылған. Үҙгәрештәргә ярашлы, ҡорос торбаларҙың хеҙмәт итеү ваҡыты тамамланған, һуңғы ваҡытта авариялар йышайған. Халыҡты һыу менән ышаныслы һәм өҙлөкһөҙ тәьмин итеү өсөн 6,2 километр һыу үткәргесен яңыртырға кәрәк.

Башҡортостан Башлығы республика Хөкүмәтенә ошо объектты тиҙ арала ремонтларға ҡушты.

– Һыу бүлеү – Учалылағы иң ҙур мәсьәлә. Ул бында берәү генә, һәм һыу тапшырыуҙың башҡа сығанаҡтарына күсеү мөмкинлеге юҡ, - тип һыҙыҡ өҫтөнә алды республика етәксеһе. - Быйыл һыу үткәргескә бүленгән аҡса етмәй. Мәсьәләне хәл итергә кәрәк.

Бынан тыш, Учалы районында республика сигенә яҡын юлдарҙы тәртипкә килтерергә кәрәк. Башҡортостан Башлығы төбәктең Транспорт һәм юл хужалығы министрлығына тейешле йөкләмә бирҙе.

Кәңәшмәлә Баймаҡ һәм Йылайыр райондарында ташҡынға бәйле мәсьәләләр тикшерелде. Бында 9-12 июлдә айлыҡ яуым-төшөм нормаһының 40 проценты яуған, ул йылғаларҙа һыу кимәленең ҡапыл артыуына килтергән.

Баймаҡ районы хакимиәте башлығы Фәнис Әминев һүҙҙәренсә, иҫкәртеү саралары һөҙөмтә биргән - биләмәләрҙе һыу баҫыу хәүефе янамай.

- Бер нисә тәүлек ошо мәсьәлә менән ныҡлап шөғөлләндек. Урындағы халыҡҡа ҡурҡыныс янамай. Бетерә ауылында дамба йырылғанда Бөрйән районының ике ауылын һыу баҫыуы ихтимал ине, - тине Фәнис Әминев. - Район бюджетын йыуылған юлдарҙы тергеҙеү өсөн яңынан ҡарайбыҙ. Күпер үткәүелдәрен ремонтлау өлөшөндә беҙгә ярҙам итеүегеҙҙе һорайбыҙ.

Йылайыр районы хакимиәте башлығы Борис Мелкоедов Кананикольский ауылында Ҡана йылғаһындағы дамбаның йырылыуы һәм күперҙең терәк бағаналарының емерелеүе тураһында хәбәр итте.

– Быуа ысынлап та йырылды, был иҫке ҡоролма. Һыу баҫыу хәүефе юҡ, - тип аңлатты Борис Мелкоедов. - Хәҙер быуаны нисек тергеҙеү хаҡында уйларбыҙ. Тағы ла етдиерәк һорау бар - һыу күпер таяуҙарының береһен йыуып төшә. Әлегә юлды яптылар.

Башҡортостан Башлығы республика Хөкүмәтенә ташҡындан һуң емерелгән юл инфраструктураһын тергеҙеүгә ҡушылырға ҡушты.

- Ярҙам итергә кәрәк, - тип йомғаҡ яһаны төбәк етәксеһе. - Был тәү сираттағы бурыс.

Фото: Башҡортостан Башлығы сайты.