Башҡортостанда аҙ ҡатлы йорттар күбәйәсәк

Башҡортостан Республикаһы Хөкүмәте Премьер-министры вазифаһын башҡарыусы Андрей Назаров рәйеслегендә үткән хөкүмәт ултырышында ошо хаҡта һүҙ барҙы. Осрашыу 2024 – 2030 йылдарға Башҡортостан Республикаһында аҙ ҡатлы торлаҡ төҙөлөшөн үҫтереү концепцияһын раҫлауға арналды.

– Концепцияны тормошҡа ашырыу төҙөлөш материалдары етештереүсе предприятиеларҙың ҡеүәтен арттырасаҡ һәм яңыларын асыу мөмкинлеген бирәсәк, – тине Андрей Назаров.

Башҡортостандың төҙөлөш һәм архитектура министры вазифаһын башҡарыусы Артем Ковшов билдәләүенсә, 2023 йыл йомғаҡтары буйынса Башҡортостан Республикаһында 3 миллион квадрат метрҙан ашыу майҙан файҙаланыуға тапшырылған. Был күрһәткес 2022 йыл кимәленә ҡарата 108,3 процент тәшкил итә. Торлаҡ төҙөлөшө тармағында шәхси йорттар өлөшө – 62,1 процент. Башҡортостан халҡы 17 меңдән ашыу шәхси йорт һалған, уларҙың дөйөм майҙаны – 2 миллион квадрат метр.

– “Башҡорт йорто” концепцияһы аҙ ҡатлы йорттар ҡалҡытыуҙы ғына түгел, ә йәшәү өсөн барлыҡ уңайлыҡтары булған ҡасабалар төҙөүҙе күҙ уңында тота. Был шәхси йорттар төҙөлөшөн системаға һалыу, тәҡдим ителгән торлаҡтың сифатын яҡшыртыу һәм төҙөлөш эштәрен ваҡытында тамамлау мөмкинлеген бирәсәк, – тине Артем Ковшов.

Андрей Назаров Башҡортостандың Төҙөлөш һәм торлаҡ-коммуналь хужалыҡ министрлығына күрше төбәктәрҙең тәжрибәһен өйрәнергә һәм октябрь аҙағына тиклем концепцияны эшләп бөтөргә, аҙ ҡатлы төҙөлөштө үҫтереүгә йүнәлтелгән сараларҙы асыҡларға ҡушылды.